HRUAITU PAKHATIN PATHIAN RAWNG THAHNEM NGAI TAKA A BAWL TLATNA CHUAN HNAMPUM SIAM THAṬNA A THLEN THEI A NI.

#ZONEWS #FIANRIAL August 01, 2025:
Vawiin kan fianrial hunah chuan a pa Ammona an thah hnua kum riat mi lek nia Lal lo ni ta, Josia chungchang hi ngaihtuah ila. Josia chu naupangte nimahsela, Pathian rawng a bawl tlat a, an rama milem pathiante chu tibo vekin, mipuite chu kawng dikah a hruai kir leh a ni. Pathian Biak inte a siam that leh laiin, Dan thu lehkhabu a hmuchhuaka, chu chuan a rampuma inchhirna leh inlamletna kawngah hruaiin Pathian tana inpekna tharah a hruai lut leh a ni.

THU CHU CHHAR LEH A NI.

2 Lalte 22:11
Tin, lalin dan lehkhabu thute chu a han hriat chuan heti hi a ni a, a puante a pawt thlêr ta a.

Nunphung leh Chanchin tidanglam dawrh thei rohlu hloh tawh chhar ve ta la eng tin nge I tih ang?

Biak in a siam that leh lai khan chutiang dinhmunah chuan Lal Josia chu a ding a. Dan lehkhabu a hmuchhuak a. Chu dan bu avang chuan, Kum naupangtea lal lo ni ta Josia chuan Pathian belh tlat chu thlangin a mite chu dikna kawngah chuan a hruai kir leh a ni.

Kan vela mite chuan kawng dik lo zawh mahsela, kawng dik chu zawh tlat thei turin eng thilte nge kan tih ang?

Josia chu a lo puitlin ang zelin Pathian hnena a inpekna pawh a thuk deuh deuh a. Juda ram pumpuia milem pathian biakna chu a tibo vek a, Pathian biakna hmun pawimawh Biak in siam ṭhat leh chu thupui berah a nei ta zawk a ni. Pathian tana kan inpekna tilang turin, Pathian tan kan hun leh hmunte kan dahin kan pe hmasa ve ṭhin em le?

Dan bu hmuhchhuah chu thil engkim inthlak thleng tanna a ni a. Dan bu chhunga thute a han hriat chuan, Josia rilru a khawih em em a, hnampum inchhira simna turin hma a la ta nghal a ni. He thil thleng hian, A Thu hmanga a mite chu Ama hnen lama hruaikir leh tur leh A mite thinlung tidanglam tura Pathian Thu thiltihtheihzia a tarlang chiang hle a ni.

Kan nitin nunah keimahni min kaihruaia, min siam dik turin eng ang chiahin nge Pathian thu hi hun leh hmun kan siamsak ve thin le?

Josia thil tih chu ama mimal tan chauh a ni lova a hnampum tan a ni. Juda mipuite chu Pathian nena an thutiam siam ṭhatna kawngah a hruai leh a. Hei hian hruaitu nihna diktak chuan thlarau siam tharna kawngah midangte chu a hruai ṭhin a ni tih a lantira. Kan bula awm ten Pathian thutak chu an zawna, chutah chuan an awm theihna tura kaihruai turin engtin nge kan tiha hma kan lak ve ang?

NGUN TAKIN INNGAIHTUAH ILA!
Kan nunah thlarau lam “RO” chu eng ang chiaha ngaihsak ṭhin nge kan nih tih leh, kan lo ngaihsak tawk lo ṭhin em tihte ngun takin ngaituah ila. Pathian thu leh A pawimawhna hmuhchhuah leh kan ngaihna laite a awm em? Pathian Thu (Bible) chu chhiara, chu chu ngun taka ngaihtuah a, kan thiltih leh ngaihtuahnate hruaitu nihtir hi i phalsak ve ang aw.

Hun rei vak lo chu Pathian leh A thu ngaihtuahnan hun leh hmun pe ve teh ang. Bible thu eng emaw thlang chhuakin ngun thluk takin zir ila, ka hnenah Pathian thutak chu puanchhuaha a awm theihna turin Pathian hnenah dil ang aw.

ṬAWNGṬAINA
2 Lalte 22:8
Tin, puithiam lalber Hilkia chuan lehkhaziaktu Saphana hnenah, “LALPA inah dan lehkhabu chu ka chhar ta e,” a ti a. Tin, Hilkia chuan lehkhabu chu Saphana a pe a, ani chuan a chhiar ta a.

Ka Pa leh ka Pathian, ka kum naupan emaw upat emaw vang mai hian Nangmah leh I Thua innghah leh, Nangma tana hun leh hmun pek hi tawpsan ka duh love. Lal Josia thinlung ang kha min pe la, eng ang kawng pawh zawh dawn ila, eng ang thil pawh kal tlang dawn ila, I thutak kawng chauh chu zawh tlat duhna thinlung min pe ang che. I Thu thianghlim chu zawnga tah chuan awm tlat ka duh e. I Thu leh I thutiamte chu chatuan a tan a ni si a. Nangmah chauh chu en chunga, Nangmah leh I Thua ka awm theihna daltu zawng zawng chu ṭhiat zel thei turin chakna min pe ang che. Isua hmingin ka dil e, Amen!