INDEPENDENCE DAY, 2025 LAWMNAAH INDIA KHUA LEH TUI ZAWNG ZAWNG TEL TURIN AN SAWM

#ZONEWS August 13, 2025: Kum dang ang bawkin, rampum hmun dang rualin Mizoram hmun hrang hrangah pawh August ni 15 hian Independence Day vawi 79-na ropui takin lawm a ni leh dawn a.

Mizoramah chuan he Ni puala lawmna pui ber chu Sipai Lammualah August ni 15, 2025, zing dar 9:00 ah neih tan a ni ang a. He hunah hian Chief Minister Pu Lalduhoma chu khuallian a ni dawn a. Lammualah Hnam Puanzar pawtparhin Parade Contingent te a endik ang a, an chibai buknate chhangletin March Past neih zui a ni ang. Chief Minister-in Independence Day thuchah a sawi zawhah National leh State Award chi hrang hrangte a sem nghal ang a, Parade contigent-te hnenah lawmman a hlan bawk ang.

Minister ten chan insemin District Headquarters zawng zawngah an hmanpui ang a, Sub-Division (Civil) leh Block hrang hrangah sawrkar anga lawmna inkhawm neih a ni bawk ang.

Mizoram sawrkar chuan he hun pawimawh tak hmang tur leh a hmanna hmunah te, tel theuh turin khua leh tui zawng zawng te a sawm a. A bik takin sawrkar hnathawkte chu Independence Day lawmna programme-ah tel ngei tura hriattir an ni.

Lammuala Independence Day programme hman zawh a nih hnu chhun dar 11 ah sawm bikte tan Governor’s ‘AT HOME’, Raj Bhawan-ah a awm leh dawn a ni.

Hetih rual hian khua leh tui ten an chenna inah leh an hnathawhna in (building) bakah sawrkar pisa zawng zawngah India hnam puanzar tar turin sawkar chuan a ngen bawk a ni.