KAN NUN INTHLAK DANGLAMNA CHU, MAHNI TLINLOHNA LEH, KAN PHAK TAWK CHIN HRIAT CHIANNA AṬANGIN A LO INṬAN FO ṬHIN

#ZONEWS #FIANRIAL August 19, 2025 Thawhlehni:

“KAN NUN INTHLAK DANGLAMNA CHU, MAHNI TLINLOHNA LEH, KAN PHAK TAWK CHIN HRIAT CHIANNA AṬANGIN A LO INṬAN FO ṬHIN“

Vawiina kan fianrial hunah chuan Lal Nebukadnezzara chanchin leh chapona atanga thuhnuairawlhna, inngaihtlawmnaa a inthlak danglam dan kha ngaihtuah ila. Daniela’n a mumang a hrilh fiah sak hnuah, Nebukadnezzara chuan a chapona avangin Pathian hremna a tawk ta a, kum sarih chhung zet ramhnuaiah ramsa ang maiin a khawsa a ni.

LAL LEH RAMSA
“Tin, chûng ni tâwpah chuan kei, Nebukadnezzara chuan vân lamah ka mit ka lên chho va, ka hriatna chu ka hnênah a lo kîrleh ta a, chungnungbera chu mal ka sâwm a, nung renga chu ka fak a, ka zah a, a rorêlna chu chatuan rorêlna a ni a, a ram chu chatuan awmchhûng zawng zawng a ni si a: ” (Daniela 4:34).

Thuhnuairawlh leh inngaitlawma taka i awm theihna tura beng hniamtu che dinhmun i lo awm ve tawh thin em?

Lal Nebukadnezzara chanchin hi, Pathianin kan thinlung leh rilru thlak thleng nana kan awmdan leh dinhmunte a hman thin zia entirna chiang tak a ni.

Nebukadnezzara, lal thiltithei leh chapo tak mai bawk si chu, Daniela’n a mumang a hrilhfiahna hmangin, a chapona chuan tluknaah a hruai dawn a ni tih vau lawk leh hriattir a ni a. Vaukhanna a tawng chung pawhin, a hlawhtlinnate chu ama thiltihtheihna hmanga engkim neiah inchhalin a lo chapo ta em em mai a. Pathian hrilhlawkna thu chu a kum leh lawk chuan a chungah a rawn thleng dik ta a. Nebukadnezzara chu ramsa ang maia awmin ramhnuaiah kum sarih chhung ngawt mai hnawhchhuahin a awm ta a. He kum sarih chhung hian a nun inthlak danglamna nasa tak mai chu a tawng ta a ni.

Kan nuna Pathian hnathawh theihnghilhin, kan hlawhtlinnate chu keimahni theihna vang ve reng emaw tiin kan lo awm ve tawh thin em le? Chapona hlauhawmzia leh tlukna min thlen tir mai theih dan he chanchin hian chiang takin min zirtir a ni.

Ramsa ang maia awma hremna hun a hman chhungin, Nebukadnezzara chuan thlirna thar neihna hun remchanga a tawng ta thung a. A lalna leh thiltihtheihna zawng zawng hlih sak a ni a, a thiltihtheihna lo chhuahna dik tak leh inngaihtlawmna awmzia chu atakin a zir ta a. Kum sarih a lo ral hnuah chuan ramsa anga a awmna atangin mihring pangngai ngaihtuahna a lo pu leh ta, thuhnuairawlhna thinlung nen Pathian engkimtitheia thiltihtheihna chu a lo hre chiangin a lo pawm ve ta a ni. “a rorêlna chu chatuan rorêlna a ni a, a ram chu chatuan awmchhûng zawng zawng a ni si a” tiin a puang chhuak ta hial a ni. He chanchin hian, chaponaa kan tluk lohna tura kan nun ngei pawh hi inenfiah fo turin min hrilh nawn a ni.

Kan thiltih engkimah kan chakna hnar dik tak, Pathian thiltihtheihna chu kan hre reng thin nge ni a, keimahni chakna leh theihna kan hmachhuan zawk thin le? Nitina thuhnuairawlh leh inngaitlawm taka Pathian nena leng dun zel thei turin engtin nge hma kan lak ve ang le?

Nebukadnezzara inthlak thlengna hian, kan nunna chunga Pathian thuneihna hriat chian leh inngaihtlawmna pawimawh zia chiang takin min zirtir a. Kan thiltih kawng engkima Pathiana innghah thin hi ropuina tak tak lo chhuahna hnar a ni tih hre chiang turin he chanchin hian min hrilh nawn a ni. Kan nitin nun leh thiltihna kawng engkimah thuhnuairawlh leh inngaihtlawmna thinlung nei tlat turin Pathian kaihhruaina chu i zawng zel thin ang u.

Kan nuna Pathian hnathawh hre chiang turin engtin nge hma kan lak ve ang? Kan thiltih leh thutlukna siamah te thuhnuairawlhna leh inngaihtlawmna chu engtin nge kan lantir ve theih ang?

NGUN TAKIN INNGAIHTUAH ILA!
Hlawhtlinna kan chan ni leh chona kan hmachhawn thinte kha engtin nge kan chhan let thin ngun takin inngaihtuah ila. Khang hunah te khan Pathian a telvein kan tan tum a nei niin kan hre thin em?

A malsawmna avangin Pathian hnenah tih tak zetin lawmthu hlan reng thin ila, harsat niah erawh A finna chu i zawng thin ang u.

Kan bula awmte rawngbawlsakin thuhnuairawlhna bul chu tan ve ila, an thiltih avangtea anmahni fakna thute kan ka atangin chhuak fo thin rawh se.

ṬAWNGṬAINA
“Tin, chûng ni tâwpah chuan kei, Nebukadnezzara chuan vân lamah ka mit ka lên chho va, ka hriatna chu ka hnênah a lo kîrleh ta a…..” (Daniela 4:34).

Aw Lalpa, nangin min chawisan ang zelin thuhnuairawlhna chu ka nunah lo nasa ve zel sela. Ka neih leh thiltih engkim mai hi ka thuhnuaia awm ni lovin, Nangma thatna vang chauh a ni tih hrethiam zel thei turin min pui ang che. Ka thinlungah mahni intihveina leh chapona a lo luh dawnin nangin min hriattir la. Ramsa ang maia atna lakah min hum ang che. Daniela bung 4 thu hmanga zirtirna chiang tak min pek avangin lawmthu ka hrilh che a. I thiltihtheihna hmanga chapona hneh zel thei turin I thlarau thianghlim a tharin min pe ang che, Isua hmingin ka dil e, Amen!