Joint Civil Society of Mizoram (JCM) hruaitute chuan, Kawnpui-Sangrang kawnga sawrkar hmalakna naktukah an enfiah dawn.

#ZONEWS July 23, 2025: Kawnpui leh Sairang inkar kawngchhia chungchanga thuneitute darkar 48 nghaktu Joint Civil Society of Mizoram (JCM) hruaitute chuan sorkarin chet a la ta a an hriat thu leh naktukah an enfiah dawn thu an sawi.

Vawiina Akashvani News in JCM Secretary Dr Vanlalsiama Chhangte a kawmnaah he thu hi sawiin JCM chuan sorkar an nghah mek laiin sorkar chuan kawng thawm that nan cheng nuai 100 te dahin kawng siam hna pawh an thawk tana an hriat thu a sawi. A hmaa an lo sawilan hnatlanga siam chungchang pawh sorkarin chet a lak tak avangin a ngaih dawn leh dawn loh naktukah a hmun ngeia an enfiah dawn thu a sawi a ni.

Puan tawh angin JCM hian tunkar Thawhtanni khan chanchinbumite kawmin tun thla ni 19 a Kawnpui leh Sairang inkar kawngpui enfiaha an kal tuma kawng dinhmun chhiat zia leh thuneitu hrang hrang – Ministry of Road Transport & Highways, NHIDCL leh Mizoram sorkar ten a rang lama tlan theiha an thawm that an phut thu an lo sawi tawh a. Darkar 48 chhung thuneitute an nghah dawn thu lo sawiin vawiin chawhma khan darkar 48 hi a ral ta a ni.