KAWNPUI – SAIRANG ROAD (NH-6) CHUNGCHANG NGAIHTUAHIN COORDINATION COMMITTEE AN THUKHAWM

#ZONEWS July 22, 2025: Vawiin khan Mizoram PWD leh NHIDCL hotute chu Secretariat Conference Hall, MINECO-ah Kawnpui leh Sairang inkar kawng chungchang ngaihtuahin an thukhawm a, kolasib District Addl SP pawh sawm a nih angin a tel bawk a ni.

Meeting kaihruaitu Pu K. Lalthawmmawia, Commissioner & Secretary, PWD chuan Chief Minister thurawn anga meeting hmanhmawh koh a nih thu sawiin NHIDCL-in Kawnpui leh Sairang (NH6) inkar kawng an siam chu an enkawlzui that tawk loh avanga kawng a chhiat thu leh tun dinhmunah hmanhmawh taka siam that ngaia a awm thu sawiin nitin mamawh ei tur, bungrua leh tuialhthei phur lirtheite an tlan that theih loh avanga mipui ten an tawrh nasat thu a sawi . NHIDCL ten kawng thawmthat hna an thawh chu tanpui turin Mizoram PWD te ruat an nih thu a sawi a, kawng chhelaite siam that hna PWD department ten an thawhpuina tur atan hian Rs Nuai 100 ruahman a nih thu a sawi.

Engineeer-in-Chief, PWD pawhin thu sawiin Mizoram PWD te chu NHIDCL te tanpui tura an inpeih reng thu a sawi. Technical Director NHIDCL, New Delhi chuan, kawng siam that hna thawh a nih lai hian lirthei tlan dan mumal tak (traffic management) a awm a pawimawh thu a sawi a; PWD te tanpuina leh traffic management tha tak a awm theih dawn chuan ni 10 chhunga siam that theih a beisei thu sawiin, boruak chhe zual tur venna atan Director (T) NHIDCL pawh naktukah a rawn kal nghal dawn tih a sawi bawk a ni.

He meeting-ah hian a rang thei ang bera kawng chhelaite siam that thuai a nih theih nan, hna thawh dan tur vil zui tur Kolasib DC kaihhruai Joint Operation Group din nghal a ni a, member atan Chief Engineer, Highways, PWD, Superintending Engineer, NHC-I, PWD, Superintendent of Police, Kolasib District, Sr. Executive Engineer, NHD-III, PWD, Sr. Executive Engineer, Kolasib Division, PWD, Officer-in-Charge, Sairang Police Station, NHIDCL leh PMU, Kolasib, NHIDCL te ruat an ni.

Chairman chuan kawng siam that chu thil hmanhmawhthlak a nih avangin Joint Operation Group te hian hna thawh dan tur an duan nghal tur thu sawiin uluk taka vil tur leh hmasawnna thlen nghal tura a beisei thu a sawi a ni.