KAWNPUI TO SAIRANG KAWNG CHHE LUTUK CHUNGCHANGA JOINT CIVIL SOCIETY OF MIZORAM (JCM) PRESS RELEASE (No. JCM-25/PR-02(M))

#ZONEWS July 21, 2025: Joint Civil Society of Mizoram (JCM) hnuaia heng Pawl hrang hrang – Mizoram Transformation Movement (MTM), Centre for Environment and Social Justice (CESJ), Mizoram First (MF), leh Citizens Alliance for Truth and Justice (CATAJ) te leh Mizoram Tippers Association, Mizoram Truck Drivers Association, All Mizoram Commercial Tippers Association, Fak Hlawh Lo Valrual, leh YMA leh Village Council aiawh thenkhatte chuan July 19, 2025 khan Kawnpui atanga Sairang
National Highway 306 & 06 dinhmun kan enfiah a, he kawngpui hi Kawnpui atangin Sairang thlengin hemi ni hian kan zawh chhuak vek a ni.

Kawngpui chhiat zia a takin a hmunah kan hmu a. He kawngpui pawimawh km 40 vel, Mizoram ‘Life Line’ hi lirthei tan kal rual loh a ni tih a lang a. Khuar thuk tak tak leh tuitling te, nal tak takte awm nualin, motor tlu a awm nual bakah truck tam tak kal thei lovin ni tam tak chhung an awm tawh a, hei hian Mizoram mipui leh hnathawh mekte, sumdawngte nitin nunphungte a ti buai tak meuh bawk a ni.

He kawng dinhmun chhe tak avang hian Mizoram Oil Tanker Drivers Association chuan July 19, 2025 zing atangin tlan loh an rel a, Drivers leh Owners Association tam tak pawhin an thlawp bawk a ni. Hei hian tui alhthei leh mipui nitin mamawhah harsatna nasa tak a thlen nghal bawk.

Kawngpui tha lo hian mipui nunphung a tih bahlah mai bakah India ram state pakhat kan nih angin, National Security atan a pawi thei hlein kan hria a, Mizoram hian Myanmar leh Bangladesh te nen international border neiin China pawh a hnaih hle a, ramdang mi raltlan mi tam tak an awm mek lai a lo ni bawk nen; he kawng hi Central Government tan pawh ngaihthah chi a ni lo hlein kan hria a ni.

KAWNPUI TO SAIRANG KAN TLAWH ATANGA KAN HMUH LEH HRIATTE CHU :

1. He kawngpui KM40 vel zet hi a taka hmuhin a chhe tak zet a. Tanker te leh motor dang tam tak an tlan duh lo/thei lo pawh hi a awm hle reng a ni. Khuar thuk tak takte, tui tling thuk tak te, chirh diak leh kawng nal em emte a tam a, motor khalh tute tan anmahni nunna leh motor tan a hlauhawmin a mangan thlak tak zet a, motor tlu a awm nual reng bawk a ni.
2. He kawng hi a tluana kan zawh lai hian siam tura hnathawk an awm leh awm loh kan thlithlai nghal a. Excavator pathum leh JCB 1 hnathawk kan hmu a, mihring hnathawktu phei chu mi 5 vel chiah kan hmu a ni. Heti taka buaina a awm lai hian a hna kengkawh mektu NHIDCL hian rang taka siam tumna an neilo em ni aw tih theih a ni. Excavator te pawh hi a chhe lai siam tur vek ni lovin motor tang nawr chhuahna atan tea dah an niin a lang. Concrete kawng awm siam mekte chu a la tlem hle a ni.
3. Truck ding ngir khupin kalkawng a tih pin vek avangin Khamrang leh a chhehvel khaw mipuiten harsatna tam tak an tawk a, chak lakna tur motor a kal thei lova; damlo tan damdawi in pan a harsain office dawr turin te ke a kal te a ngai a, motor tang tlawmngaia buaipuiin an hah hle a ni.
4. Kalkawngah Truck tangkhang za tam tak a awm a, lirtheia eizawng tuten an tuar nasa hle. Driver leh handymante, ei tur neilo an tam hle a, intihfaina tha a awm loh avangin an hriselna pawhin a tuar thei mai dawn a ni. Khamrang khuaah chuan nitin mamawh an harsa hle a, Kawnpui lama damdawi in leh Bank pan tur pawhin a buaithlak hle.
5. Kawng chhia hi thui viau mahse tlan theih loh tarpan, khuar thuk lutuk lai chu zawm khawm vek ta ila, a sei berah 1km bak ni lovin kan hria a ni. Khuar thuk lutuk pawh hi hmun 6 vel bakah a awm lo niin a lang. Kawng hi mam leh hnum tha tak turin tumahin an beisei lova, mahse kal theiha siam erawh mi zawng zawng beisei a ni. Hetianga siam tur hian thil harsa lutuk niin a lang lova, ni tam pawh a ngai lo niin a lang.

JCM te chuan kawng siam tha tur hian rawtna kan siam duh a, chung te chu:

1. Emergency Repair : Kawng chhiat em emna hmun hi a vaiin 1 km aia thui ni lovin kan hria tih kan sawi tawh a, heng hmun te hi rang takin NHIDCL hian an siam tur a ni. An siam hun chhung tur leh an siam zawh hun tur thlengin mipui min hriattir vek kan phut a ni.
2. State Highway (Kawnpui to Durtlang) kawng lama kal dan ngaihtuah : Hetiang hun harsa hi a hmain kan ram hian kan lo tawk tawh a, chung hunah chuan tlang kawng, (Kawnpui to Durtlang) lamah hian a inchhawka kal dan ngaihtuah a ni thin. Chutiang bawk chuan sawrkar hian mipui harsatna tih tlem nan ruahmanna siam thuai se.
3. Traffic Regulation leh Management: Kawng chhiatna hmun hi siam a nih thuai theihna turin traffic tha taka enkawl a ngai a, hemi kawngah hian Sorkarin hma la se, rang zawkin kawng chhe siam tuten an siam theiin a rinawm.
4. Humanitarian Relief: Khamrang leh a chhehvel khuate leh Truck a tang mek te hi an tang zel a nih chuan an mamawh eitur leh thil dang ngaihtuah sak thuai a tul a ni. Mizoram hi India ram bung khat niin kum 38 State kan nih tawh a, chuvangin a ram mipuite hian kawng tha zawk hi kan phu kan ti a. Kawng hi mipui tan hmasawnna, inpumkhatna, himna leh damna thleng nghawngtu a nih avangin a enkawltute hian an ngaihthah tur a ni lo. Chuvangin kawng tha zawka siam thei tute zawng zawng a rang thei ang bera kawng tha zawk mipuite pe turin kan beiseiin kan ngen a ni.

Joint Civil Society of Mizoram te chuan Central Sorkar, a bik takin Ministry of Road Transport & Highways (MoRTH) leh NHIDCL te, Mizoram Sorkarte rang taka hma la turin kan ngen tak meuh a. Kawng tha neih hi mipuite chanvo (Fundamental Rights) tura India Danpui Article 21 in a tih a ni tih hriaa mipuite kan chanvo chu min pe turin kan phut tlat a ni.

Vanlalsiama Chhangte Lalram Mawia Lalbiakmawia Ngente

Sd/-
Dr. LALBIAKMAWIA NGENTE
Convener JCM
Sd/-
LALRAM MAWIA
Co-Convener JCM
Sd/-
Dr. VANLALSIAMA CHHANGTE
Secretary, JCM