Khawzawl DC hovin Rualbanlote inthlannaa awlsam zawka an tel theih dan tur sawiho

Zirtawpni, July ni 4, 2025 khan Khawzawl Bawrhsap Pu K Vanlalthiana kaihhruaiin a office chamber-ah District Monitoring Committee on Accesible Election (DMCAE) leh Assembly Constituency Committee on Accesible Election (ACCAE) chu vohbik (Persons with Disability) te inthlannaa tha zawk leh awlsam zawka an tel theih dan tur sawi hovin an thukhawm.

He hunah hian vohbik te electoral roll-a an luh dan tur te, in-thlan hun a vote an thlak ve ngei theih dan tur te leh PwD certificate an neih theih nana hmalak-pui dan chungchang sawiho a ni. Khawzawl Bawrhsap, Pu K. Vanlalthiana chuan hemi certification chungchangah hian certificate an neih theih nan social welfare department leh health department te nen tanho a, theih-tawp chhuah a tul zia a sawi a, vohbik te ram hruaitu thlan ve theih hi an dikna chanvo a nihna angin chumi kawng sial sak ngei an tum a tul thu a sawi bawk.

He hunah hian SDO (Sadar), CMO, EO, SDEO , Sub Hqrs YMA , Sub Hqrs MHIP President te leh PwD candidate te an tel a ni

#zonews #chanchinthar #khawzawl