Khawzawlah bank hnathawh thlirletna nei turin an thukhawm

#ZONEWS July 22, 2025: Vawiin khan DC Conference Hall-ah January atanga March thla chhunga bank hnathawk thlirletna nei turin District Consultative Committee, District Level Review Committee leh District Level Security Committee an thukhawm a, Addl. DC Pu Lalfakzuala leh SBI Lead District Manager Pu Lawmkima te’n an kaihruai.

He meeting-ah hian bank hrang hrang invenhimna atana ruahmanna an neih chungchang te, pawisa thar (fresh currency) a tlem vanga buaina awm te, PM Vishwakarma te, PMEGP te leh scheme dang hrang hranga hmalak zel dan tur te, zau zawka mipui a thlen dan tur leh mipuiin hamthatna tam thei ang bera an dawn theih dan te sawiho a ni. Hmun hrang hranga bank branch te deposit zat te, advance zat te, CD ratio te leh loan hrang hrang an pek zat te thlir ho niin aia sang thleng thei tura hmalakna – saturation camp neih dan tur te sawiho a ni bawk. Chairman Pu Lalfakzuala chuan bank te mipui innghahna an ni a, hmasawnna thlen thei thu lian tak an nihna angin mipuiin hamthatna tam thei ang bera an dawn theih nan theihtawp chhuah turin a chah a ni. District-a bank te’n kum 2025-26 chhunga loan an pek tur atana bitum, Annual Credit Plan 2025-26 Chairman chuan a tlangzarh nghal bawk a ni.

He hunah hian NABARD, RBI leh SBI hotute bakah bank branch hrang hrang manager te leh hotute an tel a ni.