Kolasib-ah Bank-a Pawisa dah lâk chhuah loh (Unclaimed Deposit) chinfelna (DEAF) beihpui thlakna hawn a ni

#ZONEWS KOLASIB October 10, 2025 : Vawiin khan Kolasib-a DC Conference Hall-ah bank account hrang hranga pawisa lâk chhuah loh (unclaimed deposits) chhui chhuah leh chinfelna tura thla thum chhung (oct to dec 2025) atana beihpui thlakna, Depositor Education and Awareness Fund (DEAF) chu Pi B Malsawmtluangi Addl DC Kolasib in a hawng.

He hun hi Kolasib Lead District Manager, Pu Thuamzamung Tunglut-in a kaihruai a. DEAF account chungchang te sawinzauna a neih hnuin Pi B Malsawmtluangi chuan thu sawiin, Mipui te chu he remchanna hi hmang ṭangkai tûrin leh an chhungkuaah bank account hluia pawisa theihnghilh an awm em tih enfiah ṭheuh turin a ngen . Mi tinin Sawrkar in ruahmanna a siam chu hmang ṭangkai se la, he beihpui a hlawhtlin theih nan bank zawng zawngte pawhin ṭha taka, a thehdarhna khawngah hma an lak a pawimawh a ni, a ti.

He ruahmanna hian a tum ber chu, account rei tak khawih chet lohva awm a pawisa te hi a neitu dik takte emaw, an roluah tute hnena pek lêt leh a ni.

He beihpui hian pawisa dah lâk chhuah loh (unclaimed deposits) harsatna a chingfel dawn a ni. Hei hi kum 10 aia rei khawih chet tawh lohna savings emaw current account-a pawisa awmte emaw kum 10 chhunga lâk chhuah tawh loh term deposit-te a ni. Dan dinglai angin, bank-te chuan he’ng pawisa te hi Reserve Bank of India (RBI) enkawl, Depositor Education and Awareness Fund (DEAF)-ah an dah lût ṭhin.

Mipuite’n awlsam taka he’ng pawisa te hi an zawn hmuh theih nan, RBI chuan online platform him tak, UDGAM (Unclaimed Deposits – Gateway to Access Information) portal a siam a, he tah hian mi tinin bank hrang hranga an pawisa lâk chhuah loh te hmun khatah an chhhui thei a ni.

Hemi hmalakna kalzelah hian Kolasib District-ah chuan October ni 1, 2025 atanga December ni 31, 2025 thleng awh turin ‘Camping for Settlement of Unclaimed Deposit in Account’ hi kalpui a ni dawn a.

He hun hawnna ah hian Kolasib district chhunga bank hrang hrang aṭanga thawktute leh tualchhung mi, account neitu ṭhahnem tak an tel a ni.