KOLASIB-AH LAND REVENUE & SETTLEMENT – ONLINE TAX PAYMENT SYSTEM TLANGZARH A NI

#ZONEWS Kolasib August 13, 2025 : Vawiin chawhma dar 10:30am khan Kolasib Land Revenue & Settlement Office-ah “Launching of Online Tax Payment System” neih a ni a. He System hi Sawrkar hnuaia chhiahte awlsam taka pekna tur niin Pu H. Lalramliana SDO(S) leh Settlement Officer ni bawk chuan he System thar hi tlangzarhna a nei a ni.

Kolasib Settlement Officer (SO) Pu H. Lalramliana chuan he hunah hian thusawina neiin, Sawrkar chuan dan lova chêtna lakah mipuite himna a ngaihpawimawh thu a sawi a. Chumi avang chuan Land Revenue & Settlement Office hnuaiah hian mimal ram in hlanchhawnna leh inhmun chungchangte chu fimkhur taka kalpui thin a ni a. Hemi avang hian LR&S Office chuan buaipui tur a ngah thin thu leh office dawrtu mipuite tan hun thawl zawk an ngah tawk loh chang a awm thin thu a sawi a. Chumi harsatna sukiang tur chuan Online Tax Payment System, Land Revenue & Settlement hnuaia siam a ni ta chu lawmawm a tih thu leh hmasawnna ropui tak a ni a ti a. Online Tax Payment System hi mipuite tana a awlsam zawkna tura siam a nih thu leh Chhiah pe tura Office hmunah kal kher ngai lovin, mahni in atanga him tak leh felfai taka chhiah pek theihna, Receipt-te pawh chiang taka in chhinchhiah nghalna a nih thu a sawi bawk.

Pu H. Lalramliana chuan Land Revenue & Settlement Office chu mipuite tan Office dawr nuam a nih zel theih nan a thawhktute an in hawn thu he hunah hian a tarlang a. Online Tax Payment chungchangah hriatthiam loh leh zawh fiah duh nei chuan Land Revenue Settlement Department Office-ah engtik lai pawn a zawhfiah reng theih thu a sawi bawk.

Vawiina Land Revenue & Settlement Office-in Launching of Online Tax Payment System a neihna ah hian LR&S Directorate Office atangin Pu R. Lalfakawma, Revenue Survey Inspector(RSI) leh Pu Noel C. Chhangte, Revenue Assistant(RA) te’n telpuiin Online Tax Payment System Demonstration an nel nghal a.
Kolasib Land Revenue & Settlement Office hian August 2024 leh August 2025 chhungin Leiman (chhiah) khawnna , Pass khulchhuahna leh Tax dangte atangin Cheng Nuai 193 chuang Sawrkarah a lo chhung lut tawh a, Pass 375 ziak lutin, Pass 319 Renew a awm a, Ram 511 teh fel a ni tawh bawk a ni.