KOLASIB DC CHUAN NATIONAL HIGHWAY 306&06 KAWNG CHHE LAI A HMUNAH A KALIN ENFIAH

#ZONEWS July 18, 2025: Vawiin khan Kolasib District Deputy Commissioner Pu Robert C. Lalhmangaiha chuan Kolasib District-a National Highway 306&06 Kawnpui to Khamrang kawng chhe laite a hmunah kalin a enfiah.

Kolasib District-a National Highway 306&06 Kawnpui to Khamrang kalkawng hi Assam State leh Mizoram State inpawhna kalkawng pawimawh tak niin nitin Mizoram State mamawh leh chakkhai chawkluhna kalkawng pawimawh tak a ni a. Tun dinhmunah he lai kalkawng hi fur khawchhia leh leimin in a nuai nasat avangin lirthei khalhtute’n harsatna an tawk mek a, tangkhang engemaw zat pawh an awm bawk a ni. He harsatna sukiang tur hian NHIDCL Contractor BR Goyal Construction Company chuan kawngpui thawmthat hna hi an thawk leh mek a ni.

Vawiina Kolasib DC in National Highway 306&06 Kawnpui leh Khamrang inkar a tlawhna ah hian, Lirthei tangkhang mumal taka chhuah dan turte, Lirthei him taka an in sulpel dan tur Traffic Management neih dan turte sawiho a nih bakah Excavator leh Leilaihna khawl dang leh thawktu tam zawk dah dan tur sawiho a ni a. Security leh IR Police dah belh dan tur pawh sawi a ni bawk. Kalkawng hi tha taka siam a nih theih nan lirthei in tlan chawlhlailawk dan tur sawi ho a ni a, amaherawhchu Kawnpui to Khamrang kawng hi Mizoram luhka pawimawh tak a nih avangin State chhung mipui nitin mamawh Buhfai, Oil, Gas leh Damdawi phur lirthei erawh chatlaklova a kal dan tur erawh he hunah hian ngaihtuah a ni.

Kolasib DC hian tunhnaia Kawnpui daia leimin chu a hmunah enfiahna a nei nghala. He leimin hi Border Road Organisation 74 RCC te’n siamthat hna thawkin Retaining Wall rem hna an thawk mek a ni.

Vawiina Kolasib DC in kawng a enfiahna ah hian Kolasib Addl. SP Pu F. Lalthlamuana, Kolasiba NHIDCL Project Manager Pu Saksham Tyagi leh Truck Owner’s Association-te bakah Khamrang VCP Pu Robert Lalramchuana leh Kawnpui Khawchhung VCP te’n an tawiawm a ni.