KOLASIBAH HAR GHAR TIRANGA CAMPAIGN NEIH A NI

#ZONEWS Kolasib August 11, 2025 : India ram zalenna champha vawi 79-na lawmna kal zelah vawiin khan Kolasib DC Office tual zawlawh Kolasib Har Ghar Tiranga Campaign neih a ni a. Hemi pual hian kawngzawh ‘Tiranga Yatra’, mimal in tina India hnam puan zar tura au hla ‘Har ghar tiranga’ leh thutiam sawi rualna hun hman a ni.

He hun hi Pi Lalrinchhani, Sub-Deputy Commissioner chuan kaihruaiin kalkhawmte lawmna hun a hmang a. Pi B. Malsawmtluangi, Kolasib Addl. DC chuan Har Ghar Tirang Campaign pual hian thusawina hun neiin Har Gar Tiranga chu India ram Independence Day lawmna kalzela hnam inpumkhatna a awm zel theih nana Sawrkar laipui hmalakna pawimawh tak a nih thu a sawi a. He hmalakna ah hian India hnam puanzar chu mimal in tina tar a nih theih nan India Sawrkar chuan beihpui a thlak a ni a ti a, chutihrualin hnam puanzar hi tar tur tih a nih avanga tar satliah mai lovin, India ram zalenna sualchhuaktute inpekna hrereng chung leh zalenna hlutzia hre chunga tar turin mipuite a chah bawk.

Pu Lalengliana, President, Mizoram Ex-Servicemen League Sub-Hqrs. Kolasib kaihhruaina in Har Ghar Tiranga thutiam leh aurualna neih a ni a. He hunah hian Sawrkar Officials-te, Sainik Mizoram Ex-Servicemen League Sub-Hqrs. Kolasib Member-te  leh Kolasib khaw chhunga High School thlan bikte an tel a ni.