Leilangpui Music Festival 2025 neihdan tur DC Pi Navneet Mann hovin neih a ni.

#ZONEWS July 22, 2025: Leitlangpui Music Festival 2025 neih tur chung chang sawihona hmasa ber chu, vawiin khan Lunglei DC Conference Hall-ah Pi Navneet Mann, Lunglei DC kaihhruainain neih a ni.

He sawihona kaihruaitu Pi Navneet Mann chuan, sawihonaa tel member-te chu theihtawp chhuaha hma la tur leh, nikum 2024 ang bawka kut hlimawm leh hlawhtling tak hman a nih theihna tura thawk turin a fuih a ni.

Working Committee Secretary, Lunglei Municipal Council CEO, Pu Donny Lalruatsanga chuan kum 2024 Lunglei Music Festival, November 14-16 a neih chu a thlir let a, a pumpui thuin a hlawhtling hle a ni a ti. Vice Chairman leh Tourism Department Director Pi R. Lalrodingi chuan he kutin a kaihhnawih zawng zawng – department hrang hrang te, he hun huaihawttu team-te, NGO-te, Media leh mipui zawngte hnenah lawmthu sawi pahin, LMF 2025 ruahmanna hmasa tlangpui a sawi bawk a ni.

Tourism Minister Pu Lalnghinglova Hmar kaihhruai Organising Committee chuan LMF 2025 hi November 13-15 chhungin, Pukpui Kawmzawl, Lungleiah neih turin an ruahman a ni. He kut chhung hian – Rimawi leh lam hmuhnawm tak takte, thilsiam pho chhuahnate, eitur tui tak tak dawr te, hnam thuam pho chhuahna leh intihhlimna chi hrang hrang awm tura ruahman a ni a. Kum 2024 LMF hman tawh atanga hmasawn ngaihna laite sawiho nghal a ni bawk.

LMF 2024 atan khan, sum a zavaiin nuai 45 hmuh a ni a, hengte hi – Ministry of Tourism atangin nuai 25, NEC leh Mizoram sawrkar atangin nuai 10 ve ve a ni. Brighter Co, and BBY Animals te nen kum thum chhung atana he hun huaihawt tur hian inremna (contract) ziah a ni. LMF 2025 atan hian Ministry of Tourism leh Mizoram Sawrkar atangin nuai 25 ve ve hmuh beisei a ni a. Sum mamawh dang thawk chhuak turin Sponsorship Committee chu Tourism Director kaihhruaina hnuaiah din a ni bawk.