Lunglei Addl DC-in Thawnthu Insawisiaka Lunglei District ai awhtu thingpui a inpui

#ZONEWS Lunglei August 13, 2025: Mizoram sawrkar Tourism Department buatsaih ‘Thawnthu Insawisiak’, State Level Storytelling Competition Grand Finale-a August ni 8, 2025 zana Ignite Studio, Aizawla Lunglei District ai awhtu, HATIM-a BA (V Se) zirlai, Zorimawii (Lunglei Ramthar) chu vawiin khan Lunglei District Additional Deputy Commissioner Pi Zoramdini chuan lengah sawmin, a hna thawh pindanah thingpui a inpui.

Addl DC Pi Zoramdini chuan Zorimawii chu hun chep tak kara District ai awha a kal theih avang leh intihsiakna ṭha taka a hmachhawn theih avanga lawm thu hrilhin, a hma lam hun atan duhsakna a hlan a. District ai awhtu puala dah sum fai ₹10,000 a hlan bawk.

August ni 6, 2025 (Nilaini) khan Lunglei DC Conference Hall-ah Lunglei District Level Storytelling Competition buatsaih niin, he inelnaah hian pakhatna a nih angin Zorimawii hian State Level inelnaah Lunglei District ai a awh a. Participation prize a dawng a ni.