Lunglei DC-in a din joint verification team-in Ṭawipui North-II daia lirthei chetsual tamna hmun an en fiah

Lunglei, 2025 Nikir thla ni 27: National Highway-54 kawngpui Ṭawipui North-II daia lirthei chetsual tamna hmun endik a, hma lak dan tur zir chiang tura Lunglei District Bawrhsapin a din, joint verification team chuan vawiin khan he lai kawng hi en fiahin, hma lak zui dan tur an sawi ho.

Joint verification team hi Sub-Divisional Officer (Sadar) Pi TT Beikhaizi chuan hovin, PWD, I&PR leh LA Branch official-te, NH kawng enkawltu NHIDCL leh contractor BRN Infrastructure Pvt Ltd ai awhte, Ṭawipui N-II VC, Sub-Headquarters YMA, Ṭawipui Group YMA leh Ṭawipui N-II Branch YMA ai awhte an tel a. Kawng luan (seal coating) nal deuh lai metre 200 vela thui chu BRNIPL te’n a chung tithap turin hma la nghal se tih niin, an hna thawh dan hi Ṭawipui N-II Branch YMA hruaitute’n lo enpui se, tih a ni a. Kawng kual ulh lai tiziaawm turin laih belh a ṭul dawn nia a lan avangin thuneitu sang zawkah thlen ni se, tih a ni bawk.

Chetsualna thleng thei lakah he lai kawnga lirtheia tlante an lo him zawk nana hma lakna hmasa atan, Lunglei DC leh SP te ruahmannain ‘fimkhur tura inhriattirna’ (road signage) chu Lunglei District Police te’n June ni 3, 2025 khan an lo tar tawh a ni.