Lunglei District Magistrate-in Lunglei District chhunga vawk vulhte ASF hri leng laka an himna atana zawm tur thupek a chhuah

#ZONEWS Lunglei October 6, 2025: Tun dinhmunah Lunglei District-ah African Swine Fever (ASF) hri leng chuan ziaawm lam a pan zel laiin, hri leng hi darh leh thut thei reng a nih avangin ran vulhte ASF laka an lo him theih nan leh hri a darh zel loh nan leh dan chah a nih theih nan vawiin, October ni 6, 2025 khan Lunglei District Magistrate Pi Rochuangkimi Khenglawt chuan Section 163, Bharatiya Nagarik Suraksha Sanhita (BNSS), 2023 tlawh chhanin Lunglei District huam chhunga mipuite zawm turin a hnuaia mi ang hian thupek a chhuah:

1. Lunglei District chhungah ram dang, state dang leh district dang aṭangin vawk, vawk sa leh vawk sa aṭanga siam ei tur chi reng reng lak luh khap tlat a ni.

2. ASF hri lenna hmun (infected area) aṭangin vawk, vawk sa leh vawk sa aṭanga siam ei tur lak luh leh lak chhuah khap tlat a ni.

3. Lunglei District chhung khua leh khua inkara vawk la turte’n Vety Department aṭangin soundness certificate an nei ngei tur a ni.

4. Vawk damlo reng reng talh leh hralh khap tlat a ni a, vawk damlo chu dah hran vat tur a ni.

5. Vawk damlo leh suat tur neite’n a rang thei ang berin District Vety Hospital emaw, mahni khua/veng VFA/LC/VC/Task Force-te hnenah hriattir vat tur a ni.

6. Vawk thi leh suat reng reng disinfectant (chinai/bleaching) nen thuk taka phum tur a ni a, bawlhhlawh paihna hmunah leh lui kawr remchangah vawk thi an paih tur a ni lo.

7. Vawk talh turte’n RAgT Test an ti ngei ngei tur a ni, RAgT Test-a negative chauh an talh tur a ni a, Soundness Certificate an nei ngei ngei tur a ni.

He thupek hian thu leh awm hma chu chhuah a nih aṭanga thla (2) chhung a huam ang a, thupek zawm lote chu Section 223, Bharatiya Nyaya Sanhita (BNS), 2023 hmangin hrem theih an ni.