Lungleiah Bana Kaih District Monitoring Committee an ṭhu khawm

#ZONEWS Lunglei November 3, 2025: Vawiin khan The Mizoram Bana Kaih (Handholding) Scheme hnuaia Lunglei District chhunga hmasawnna tura thawhpui (progress partner)-te hma lak dan vil zui tura din, Lunglei District Monitoring Committee for Bana Kaih chu an Chairman, District Bawrhsap Pi Navneet Mann hovin DC Conference Hall-ah an ṭhu khawm.

He ṭhut khawmah hian DC office leh Bana Kaih hnuaia implementing department hrang hrang ai awhte an tel a. Bana Kaih thawh khatna (Phase I) hnuaia bana kaihna (handholding support) loan leh ṭanpuina CM’s Special Package hmutu progress partner-te department tinin an vil zui dan leh an hma lakna dinhmun tlangpui thlir ho niin, Phase II hnuaia hma lak dan tur hrang hrang sawi ho a ni.

Bana Kaih Phase I-ah Lunglei District-ah CM’s Special Package hnuaiah progress partner 359 hnenah kumin July thla khan ṭanpuina pek chhuah niin, progress partner-te hian hma an la chho mek a. CM’s Special Package hnuaia progress partner-te hi Commerce & Industries hnuaiah 128, Horticulture hnuaiah 78, Animal Husbandry & Veterinary hnuaiah 77, Fisheries hnuaiah 45, Agriculture & Farmers Welfare hnuaiah 14, Land Resources, Soil & Water Conservation hnuaiah 13, Tourism hnuaiah 2 leh Sericulture hnuaiah 2 niin, department-te’n an hma lak dan a hmuna an enfiah vek hnuah report pawh an theh lut tawh a. A ṭul anga vil zui reng an ni.

Lunglei District chhungah hian Bana Kaih Phase I-ah loan dil, progress partner atana thlan mi 50 awmin, loan pawh pek chhuah mek zel a ni a. Loan component-ah hian C&I-in progress partner 17, Horticulture-in 14, AH & Vety-in 7, Sericulture-in 5, Agriculture-in 2, Soil-in 2, UD&PA-in 2 leh Fisheries-in 1 an nei a. A ṭul angin progress partner-te hma lak dan hi department lam chuan an vil zui reng bawk.