Lungleiah damdawi in, clinic leh laboratory chungchanga District Registering Authority an ṭhu khawm

#ZONEWS Lunglei August 12, 2025: Nimin khan Lunglei District chhunga hriselna dinhmun enfiahna leh inentirna (clinical establishment)-te dan anga chhinchhiah leh khuahkhirh tura din, District Registering Authority (DRA) chu Lunglei District Additional Deputy Commissioner Pi Zoramdini hovin a hna thawh pindanah an ṭhu khawm.

Sawrkar laipui dan siam, The Clinical Establishments (Registration and Regulation) Act, 2010 beh chhanin Mizorama clinical establishment-te chhinchhiah, khuahkhirh leh vil zuina tur, The Mizoram Clinical Establishments (Registration and Regulation) Rules, 2014 chu Mizoramah hman a ni a. He dan hnuaiah hian damdawi in, clinic leh laboratory te chu DRA-ah an inziah luh (register) vek a, a him chin leh pawm theih chin (minimum standard) an phak ngei ngei a ṭul a. Chuti ang tur chuan Lunglei District-ah pawh hma lak chhoh mek a ni.

Lunglei District Sr CMO Office-in an chhinchhiah danin, tun dinhmunah Lunglei District chhungah sawrkar hriatpui clinical establishment 51 a awm mek a. Hemi zinga 15 chu sawrkar enkawl (District Hospital, Community Health Centre leh Primary Health Centre) niin, a dang 36 chu mimal din (private) damdawi in, clinic leh laboratory a ni thung.

He ṭhut khawmah hian Lunglei District chhunga damdawi in leh clinic zinga provisional registration tihnun zawm (renew) ngaite chu hriat nawntirna (reminder) thawn ni se tih niin, laboratory-te chu permanent registration tih ngai an nih avangin kumin October ni 12 ral hmaa ti fel turin hriattirna chhuah ni se, tih a ni a. CEA dan hnuaia la lang lo, clinical establishment hnuaia rin luh ṭul turte chu department lamin lo zir chiang se tih niin, clinic leh laboratory te enfiah hun tur ruahman a ni bawk a. Damdawi in thli leh bawlhhlawh (bio-medical waste) sawngbawl leh thehthang chungchangah hmunhma ṭha zawk siam a nih theih nan hma lak dan ngaihtuah ni se, tih a ni bawk.