Lungleiah District Level Committee on Myanmar & Bangladesh Refugees an ṭhu khawm

#ZONEWS Lunglei August 07, 2025: Nimin khan Lunglei District Level Committee on Myanmar & Bangladesh Refugees chu Additional Deputy Commissioner Pi Zoramdini hovin Lunglei DC Conference Hall-ah an ṭhu khawm a. Lunglei District-a Myanmar leh Bangladesh aṭanga raltlante khawl hmanga an nihna finfiah theihna tura chhinchhiahna, ‘Biometric Enrollment’ kalpui mek chungchang an sawi ho.

He hunah hian sawrkar official-te, Lunglei Local Council Association leh Lunglei Sub-Headquarters YMA ai awhte leh refugee welfare committee ai awhte an tel a. Lunglei Sub-Deputy Commissioner Pi Lalnunchhani Hnamte hnen aṭangin report ngaihthlak a ni a. Hma lak zel dan tur sawi ho a ni.

Refugee biometric enrollment hi Lunglei District-ah July ni 30, 2025 khan kalpui ṭan niin, Lunglei Ramthar refugee camp-ah bul ṭan a ni a. Ramthar camp-ah hian zawh tawh niin, tunah hian Ṭhaizawl camp-ah kalpui leh mek a ni.

He ṭhut khawmah hian biometric enrollment atana hmanraw mamawh belhte lei tura ruahman a nih thu tar lan a ni a. Village Council/Local Council te leh Sub-Headquarters YMA te nen ṭang rualin felfai taka enrollment kalpui a nih theih nan hma lak chhunzawm zel ni se, tih a ni.

Refugee-te kim taka chhinchhiah fel an nih theih nan camp leh camp pawna awmte pawh tuam chhuak vek tura ruahman a ni a. Enrollment tih laiin power supply-ah buaina a awm loh nan P&E lam chu hma la tura ngen leh beisei an ni.

Lunglei DC office-in an chhinchhiah danin, tun dinhmun (August 2025)-ah Lunglei District chhungah raltlan awm khawmna camp pakua (9) – Haulawng (Saichhoh), Hauruang, Khawmawi, Mualṭhuam North, Phairuangkai, Pukpui, Ramthar, Ṭhaizawl leh Vanhne-ah te awmin, he’ngah hian Myanmar aṭanga raltlan 1,175 an awm mek a. Camp pawn lam, khaw chhunga in luah leh mi ina mikhual mi 816 awm bawkin, an zavaiin raltlan 1,991 awm mek anga chhinchhiah a ni a. Mipa puitling 545, hmeichhe puitling 660 leh naupang (kum 18 hnuai lam) 786 an ni.

Lunglei District chhungah Bangladesh aṭanga raltlan mi 63 awmin, Khawmawi khuaah vek an awm a. Mipa puitling 18, hmeichhe puitling 17 leh naupang 28 an ni.