Lungleiah District Level Red Ribbon Quiz Competition buatsaih a ni

#ZONEWS Lunglei, August 26, 2025: Mizoram State AIDS Control Society (MSACS) bul tumin Lunglei District Level Red Ribbon Quiz Competition 2025 chu vawiin khan Synod Mission Centre Conference Hall, Lungleiah buatsaih a ni a. Lunglei District-a sikul pariat inelin, Christian Education Centre, Chanmari chu pakhatna an ni.

DISHA (MSACS) Lunglei Cluster Programme Manager Dr Zodinpuii Hrahsel chuan inlawmna thu sawiin, red ribbon quiz competition buatsaih chhan a sawi fiah a. Inelna buatsaih chhunzawm niin, Lunglei District AIDS Control Officer Dr K. Lalhmachhuana hovin lawmman semna hun hman chhunzawm a ni bawk.

Lunglei District Level Red Ribbon Quiz Competition-ah hian sikul pariat – Christian Education Centre; One Heart Academy; 2nd Battalion MAP English Medium School; Loroto Play School; Govt Zobawk High School; Govt Middle School, Theriat; Govt Pukpui High School leh Govt Leitlangpui High School te an tel a. Heti ang hi result a ni:

1-na – Christian Education Centre, Chanmari 

2-na – Govt Middle School, Theiriat

3-na – Govt Zobawk High School

Consolation Prize – Loroto Play School

District Level Red Ribbon Quiz-a pakhatna hian ₹7,000, pahnihnain ₹5,000, pathumnain ₹4,000 leh Consolation Prize dawngtuin ₹1,000 an dawn bakah, certificate leh memento an dawng tel bawk.

He quiz competition hian a tum ber chu zirlaite hnenah HIV/AIDS chungchang leh sex hman khawlohna aṭanga natna inkai chhawn theih chungchang zirtir a, an fihlim theihna tur kawng kawhhmuh a ni a. District level-a inel tur hian August ni 19, 2025 khan online mode-in Red Ribbon Quiz Competition buatsaih a ni a. Hetah hian sikul 90 lai telin, chu’ng zinga a ti ṭha pariat chu district level-ah hian an intihsiak leh a ni.

District level intihsiaka pakhatna te hi September ni 3 & 4, 2025-a state level intihsiaknaah District ai awhin an tel leh dawn a. An tih ṭhat dan azirin national level thlengin an tel thei dawn a ni.