Lungleiah LMC hnuaia Town Vending Committee an ṭhu khawm

#ZONEWS Lunglei July 29, 2025: Vawiin khan Lunglei Municipal Council (LMC) Town Vending Committee chu LMC Chief Executive Officer Pu Donny Lalruatsanga kaihhruaiin LMC BoC Meeting Hall-ah a ṭum khat nan an ṭhu khawm a. Lunglei khawpui chhunga kawng kama thil zuara inpho chungchangah inkaihhruaina leh inkhuahkhirhna felfai zawka kalpui dan tur an sawi ho.

LMC CEO Pu Donny Lalruatsanga chuan Mizoram sawrkarin ‘The Mizoram Street Vendors (Protection of Livelihood and Regulation of Street Vending) Rules, 2017’ a siamin ‘Vending Committee’ din tura a phut angin LMC Vending Committee chu din a nih thu leh kum thum chhung atan member-te pawh ruat an nih thu a sawi a. Tun dinhmunah Lunglei khawpui chhungah kawng kama thil zuara inpho theihna hmun, vending zone 10 a awm mek thu sawiin, hmun ṭhenkhatah erawh inpho/inzuar an awm tawh ngai lo tih a sawi.

Vending Committee ṭhu khawm chuan Lunglei khawpui chhunga thil zuar inpho phalna leh phal lohna hmun, ‘vending zone’ leh ‘no vending zone’ hman lai en nawn leh siam ṭhat chungchang an sawi ho va. Zone awmna veng local council leh ward thu neitute’n lo thlithlai hmasain, August 2025 chhungin Committee-ah an hma lakna report theh lut se tiin, chumi zul zui chuan hma lak chhunzawm ni se, an ti.

Kawng kama inzuar ṭhin (street vendor)-te tan dan felfai tak siam niin, kawng kama inzuar/inphote chuan an nihna finfiahna, ID (identity) card an neih ngei a ṭul bakah, khua leh tui dik tak an nih a ṭul bawk a. ID card hi LMC-ah dil theih niin, a dil turte chuan an awmna veng local council leh YMA te hriatpuina lehkha an neih a ngai a ni.

Zan lama inpho ṭhinte pawhin ID hi nei vek tura ruahman a ni a. A bik takin, Venglai leh AOC Ramthara zan lama inpho, street food zuarte chungchang pawh sawi ho niin, mumal zawka zir chiang turin Ward No. IV Councillor kaihhruainain Local Council Lunglei President, YMA Sub-Headquarters President leh Lunglei OC te ruat an ni.

District Urban Development Officer Pi Lalhruaitluangi chuan City Street Vending Plan Lunglei awm tawh thu sawiin, vending zone, restricted vending zone leh no vending zone te tun hmaa lo ruahman tawhte a tar lang a. Thil zuarah pawh ID pek danah temporary, permanent leh stationary te an thliar thu sawiin, thil zuarho zir chianna (survey) te pawh kalpui a lo nih tawh dan te a sawi lang a. Committee chuan he Plan awm sa hi a ṭulna apianga hman turin a pawm nghal bawk.