Lungleiah LMC huam chhunga chhiarpui buatsaih tur atana training buatsaih a ni

#ZONEWS Lunglei August 13, 2025: Vawiin khan Lunglei Municipal Council (LMC) leh Mizoram sawrkara Directorate of Economics & Statistics ṭang kawpa LMC huam chhunga chhiarpui (demographic census) buatsaih tura a chhiartu (enumerator) turte tan Lunglei Convention Centre-a BoC Meeting Hall-ah thil pawimawh hrang hrang zir hona, training buatsaih a ni.

LMC Chairman Pu Lalzuithanga’n training hi hawngin, LMC-in Lunglei khawpui leh a mi chengte tana hma a laknaah dik leh felfai taka hma lak a nih theih nan inchhiarna (data) dik leh rin tlak tak a awm a ṭul tih a sawi a. Chhiarpui buatsaih tura Directorate of Economics & Statistics-in an phurpuina leh buaipuinaah lawm thu sawiin, chhiarpui chu tluang taka buatsaih a nih a beisei thu a sawi a. Enumerator-te pawh inchhiarna dik tak kalpui tura theih tawp chhuah tura chahin, chhiarpui zawh hnuah chuan data dik tak nen LMC pawhin hma a lak chhoh theih a beisei thu a sawi.

LMC Chief Executive Officer Pu Donny Lalruatsanga’n hun kaihruaiin, chhiarpui buatsaih tura inpuahchahna leh hun bi ruahman dan a sawi fiah a. LMC Executive Councillor Pi Lalhruaitluangi Sailo chuan inlawmna thu sawiin, enumerator-te chu chhiarpui tluang tak leh felfai taka kalpui a nih theih nan training-a an thil zirte ṭha taka chhinchhiah turin a chah.

Economics & Statistics Deputy Director Pu H. Lalnunzuala chuan Mizoramah a tlangpuiin kum tin nau piang mipa 51% aia tam lo leh hmeichhia 49% aia tlem lo an ni ṭhin tih sawiin, kum 2022-ah mitthi zinga 64.73%, 2023-ah 65.03% leh 2024-ah 65.1% chu mipa an ni thung tih a sawi a. Hmeichhia leh mipa inchawih tawk tura chung lamin a duan sa chu ruihhlo vangin a khawlo zo tih sawiin, hmeichhia leh mipa zat inthlauhna dik tak hre turin inchhiar chu a pawimawh tih a sawi a. LMC-in Lunglei tana rawngbawlna hun ṭha an siamsak chu lawmawm an tih thu a sawi.

LMC Demographic Census Nodal Officer, Superintendent Pi C. Lallianpuii chuan chhiarpui atana hma lakna leh ruahmanna hrang hrang a tar lang a. Directorate of Economics & Statistics aṭanga mi thiamte’n enumerator-te tana hriat tur pawimawh hrang hrang te, inchhiarna bu dah khah dan tur leh chhinchhiah tur hrang hrangte an zirtir a. A taka tih chhinna leh zawhna leh chhanna hun hman a ni bawk.

LMC Chhiarpui atan hian Lunglei Government College zirlai aṭangin enumerator tur mi 24, local council tin tan pakhat ṭheuh ruat an ni a. Ruahman lawk dan chuan, August ni 18 leh September ni 15, 2025 inkar chhungin inchhiarna kalpuiin, September ni 1 – 20, 2025 chhungin data pawimawh chhut luh fel hman tum a ni a. Inchhiarna hi ṭhuang hrang hranga endik dan tur ruahman niin, peih fel a nih hnuah local council-te nen inrawn tlanga thlir ho leh a ni ang a. Tih tur ṭul leh siam rem ngaite tih fel a nih hnuah, October ni 27, 2025-ah tlangzarh hman beisei a ni.