Lungleiah NH-302 leh NH-54 kawngpui laih zauh leh siam ṭhat hna kalpui mek dinhmun thlir ho a ni

#ZONEWS Lunglei July 28, 2025: Vawiin khan Lunglei District Bawrhsap Pi Navneet Mann hovin Lunglei DC Conference Hall-ah National Highway 54 (Aizawl—Tuipang kawngpui, Lunglei District chin) leh National Highway 302 (Lunglei—Tlabung) kawngpui laih zauh hna leh siam ṭhat hna thawh mek dinhmun thlir ho leh hma lak zui dan tur ruahmanin sawrkar official-te, kawng enkawltu NHIDCL (National Highways & Infrastructure Development Corporation Limited) leh hna thawktu contractor-te an ṭhu khawm.

Theiriata lei min vanga PWD Road chhia leh NH-302 kawng hnawh ṭhin chungchang leh hma lak tawh chin sawi ho niin, PWD Road chhia siam ṭhat dan tur chu uluk zawka zir chian a, bawhzui ni se, tih a ni a. Tun dinhmunah lei minin kawng a hnawh thian fai turin contractor lamin JCB 2 an dah reng thu tar langin, lei minin kawng a hnawh changa chak lehzuala thian fai ṭhin turin contractor-te chu chah an ni a. NH-302 kawngpui Hauruang leh Sazaikawn inkar kawng chhiaah pawh contractor-te chu JCB dah belh tur leh a chhiat zualnaah GSB phah belh tura tih niin, rang taka siam ṭhat leh then fai hna thawk ṭhin turin hriattir an ni bawk.

Joint verification team-in June ni 26, 2025-a Ṭawipui North-II khaw bula lirthei chetsual fona hmun an endikna report leh hma lak zui dan thlir ho niin, kawng luan (seal coating) nal deuh lai metre 300 vela thui chu BRNIPL te’n an hai khawh tawh thu leh kawng kual ulh lai tiziaawm turin laih belh dan tur ruahman a nih thu tar lan a ni a. A ṭul anga bawhzui zel ni se, tih a ni.

District Monitoring Committee-in NH-302 kawng laihna leivung paih dan (muck disposal) an endikna report thlir ho ni bawkin, NH-302 kawng laih meka leivung paihna hmun (spoil bank) 32 ruahman a taka kalpui a nih dan sawi ho a ni a. Spoil bank ṭhenkhatah leivung dawlna (gabion wall) siam zawh tawh a nih laiin, la siam zawh lohna hmun leh siam sain a dawl zawh lohna te a awm bawk avangin, la peih fel lohnaah chuan leivung paih rih lo tur leh lungrem hna thawk zo thuai turin contractor-te chu hriattir an ni a. Leivung paihin Ruangte lui leh a chhunga nungchate a nghawng dan leh chumi tiziaawm tura hma lak dan tur te sawi ho niin, leivung paihna hmun ṭhenkhat ṭangkai zawka hman a nih theih nana eco park siam theih dan tur ruahmanna te sawi ho a ni bawk.

He ṭhut khawmah hian NH-54 leh NH-302 kawng laih meka hmasawn dan thlir ho a nih bakah, kawng laitute’n harsatna an tawhte leh ram neitute aṭanga harsatna awmte thlir ho niin, hma lak zui dan tur sawi ho a ni a. Package tina contractor-te’n August 2025 chhungin khaw chhung bika kawng atana ram lak chin (right of way—ROW) chhinchhiah fel se, tih a ni bawk.

He ṭhut khawma tar lan a nih danin, NH-302 Package A (km 37.42-a thui)-ah hna 63.67% thawh zawh tawh niin, Package B (km 37.53-a thui)-ah hna 60.95% thawh zawh tawh a ni a. NH-54 kawngpui package 3, 4, 5, 6 & Hnahthial By Pass Road, belh khawma km 169.078-a thui (Hnahthial District leh Lunglei District bakah, Lawngtlai District chhung km 15)-ah hna 97.56% vel thawh zawh tawh a ni.