Military council-te thawhpui Meitei ralthuam keng mi 3, Moreh khaw bulah man

Sagaing region, Tamu khua atanga tlan chhuak, Manipur hel ralthuam keng pawl mi 3-te chu Moreh khaw bulah India sipaiten an man thu, hriat a ni.

Heng ralthuam keng pawl mi 3-te chu July ni 20 khan, Tamu khua atangin an tlan chhuak a, July ni 21 khan Indo-Myanmar ramri, Moreh khaw bul mel ban 79 (Pangaal Basti)-ah India sipaiten an man a ni.

“Hemi ni hian Meiteite hi hmun hrang hrangah an zawng nasa hle a ni ang, leilet hmuna thawktute pawh an zawt a, heng mi 3-te hi in hmu em tiin an zawt a, an hmuh loh avangin an kir leh a, Chaungletgyi vengah pawh an dap nasa,” tiin tualchhung mi pakhat chuan Zalen media a hrilh a ni.

Tlan chhuak Manipur hel ralthuam keng pawlte chu, Khumanthem Umakanta Singh (Chinglai kum 36) of Mongbung, Jiribam-PS, Jiribam district, Pukhrambam Naoton Singh (Tomthin kum 22) Ningthoukhong Mayai No.9 ward, Bishnupur-PS, Bishnupur district, Soibam Bargil Meitei (Phirefpa kum 23) Irom Meijrao, Wangoi-PS, Imphal west district-a awmte an ni.

Tamu biala Meitei ralthuam keng pawl thenkhatte chu India sipaite zawmin an tlan chhuak thin a ni.

India, Manipur State, hel ralthuam keng pawl Meitei sipaite hi Sagaing, Tamu District-a Military council sipaite nen thawk hoin revolution sipaite an bei rawn thin a ni.

Source: Tahan Post