Lungleiah Saikuti Hall Managing Committee an ṭhu khawm

#ZONEWS Lunglei, July 23, 2025: Vawiin khan Saikuti Hall Managing Committee chu an Chairman, Lunglei District Bawrhsap Pi Navneet Mann hovin a hna thawh pindanah an ṭhu khawm a. Lunglei Municipal Council (LMC) kuta Saikuti Hall hlan chhawnna tur ruahmanna, ‘terms & conditions’ an thlir ho.

He hunah hian Saikuti Hall enkawl zui tura LMC kuta hlan chhawnna tur ‘terms & conditions’ duan mek chungchanga rawtna hrang hrangte thlir ho leh sawi ho niin, pawm fel a ni a. ‘Terms & conditions’ hi pawmpui tur leh a ṭul anga bawhzui atan Saikuti Hall Managing Board-ah theh luh a ni ang.

Tun dinhmunah Saikuti Hall luah mek sawrkar department leh pawl hrang hrang panga an awm thu tar lan niin, Managing Committee nena inremna la nung mekte chu luah chhunzawm phalsak ni se, inremna thar siam ngai chu LMC kuta a awm hnuah LMC nena inremna siam thar atan dah ni se, tih a ni.

Saikuti Hall hi Lunglei Venglaia awm niin, a ram hi Rural Development Department Secretary hminga awm a ni a. A in hi square feet 65,000-a zau awha sak niin, chhawng li-ah pindan 14 a awm a. Puipunna pindan (auditorium) mi 1,200 vel len theihna a awm tel bawk.

Saikuti Hall hi Management of Saikuti Hall Rules, 2003 hmangin enkawl a ni a. He dan hnuaiah hian Rural Development Department Secretary kaihhruaina hnuaiah Saikuti Hall enkawl chungchanga thuneitu Managing Board awmin, a taka enkawl zui hna thawk turin Lunglei District Deputy Commissioner kaihhruaina hnuaiah Managing Committee a awm bawk a. A enkawl hna hi LMC kuta dah turin ruahmanna a kal mek a ni.