Lungsen Aspirational Block-a Elementary English Literacy Programme kalpui turah zirtirtute training buatsaih a ni

#ZONEWS July 11, 2025: Lungsen Aspirational Block huam chhunga primary sikul zirlaite’n English zirna lama hma an sawn theihna tura Lunglei Deputy Commissioner (Bawrhsap) office leh Disha Foundation te ṭang kawpin ‘Elementary English Literacy Programme’ (EELP) an ruahmanah vawiin khan primary sikul thlan bik sawm (10)-a English zirtirtute tan Lungsen BDO Conference Hall-ah ‘Teacher Training’ buatsaih a ni.

Teacher training hi online-a buatsaih niin, Disha Foundation aṭangin mi thiamte’n English zirtir dan tur leh hriat tur pawimawh hrang hrang an zirtir a. Zirlaite dinhmun leh zirtir dan tur ruahmanna hrang hrang sawi ho a ni bawk.

Lungsen Aspirational Block huam chhunga Aspirational Block Programme hnuaia EELP kalpuina tur hian primary sikul sawm (10) – Lungsenah Govt Primary School-I, II & III; Lungrang South-ah GPS-I & II; Belthei, Rangte, Rualalung, Lalnutui leh Kauchhuaha GPS ṭheuhte thlan chhuah an ni a. He’ng sikulahte hian July ni 2, 2025 khan zirlai naupangte’n English an thiam dan hriatna tura enchhinna, pre-assessment test buatsaih niin, he enchhinna aṭang hian pawl 2 zirlaite chu hawrawp pathum awmna thumal (3-letter word) leh pawl 3 & 4 zirlaite chu thumal leh thu chang kim (word & sentence) an thiam belna turin zirtir tura ruahman a ni a.

Disha Foundation aṭangin zirna hmanraw chi hrang hrang – teaching aids, workbook leh video te rawn thawnin, chumi hmang chuan zirtirtute’n an sikulah ṭheuh an zirtir zui dawn a ni.

#zonews #chanchinthar #tualchhung #lungsen