Manipur tualchhung buaina avanga Churachandpur leh a chhehvel mamawh Food Corporation of India (FCI) Aizawl Divisional Office in buhfai a thawn thin chu kumin April thla khan tihtawp a ni.

#ZONEWS July 17, 2025: FCI hotute chuan Manipur buai avanga buhfai thawn thin chu kumin April thla thleng khan kalpui a nih thu leh May thla atanga pek chhoh tawh loh thu an sawi a. Churachandpur leh a chhehvel te hman tur Mizoram kaltlanga buhfai pek chu kum 2023 June thla atang khan kalpui niin an kalpui tawp hun, kumin April thla thleng khan quintal nuai 3 sing 2 sang 2 chuang hret an thawn hman a. Tunah chuan a kawng ngai, a hmaa an kalpuina kawng, Jiribam, Assam atangin Imphal kaltlangin phurh a ni leh tawh a ni.

FCI hotute chuan Kawnpui leh Sairang inkar kawng chhia avangin khaihlak tlem azawng chu awm mahse an kudama buhfai phurh kawngah harsatna liantham an tawh rih loh thu an sawi a. Engpawh thleng se an kalphungah thla 3 daih buhfai an kudama dah reng chu an kalpui mek thu an sawi a. Tun dinhmunah phei chuan thla 4 emaw thla 5 daih buhfai a awm rih thu an sawi a ni.

Manipur tualchhung buai hnua tanpuina tur buhfai kum 2023 June thla atanga thawn thin chu kumin April thla khan tih tawp a ni a, thuneitute chuan Mizoram kaltlanga buhfai an thawn tak loh chhan chu Manipur-a President’s Rule kalpui avanga boruak a ziaawm chhoh vanga nia an hriat thu an sawi a. Hetihrual hian engpawh thleng thei a nih avangin Mizoram kaltlanga pek pawh eng chen nge a tawp dawn tih an hriat loh thu an sawi a ni.