Meteorological Centre Aizawl Director-in an hmalakna leh hmachhawpte Larsap a sawipui

#ZONEWS July 23, 2025: Vawiin khan Pu Sudheer Kumar Dwivedi, Director & Head, Meteorological Centre Aizawl, India Meteorological Department (IMD) chuan Larsap, General (Dr) Vijay Kumar Singh, PVSM, AVSM, YSM (Retd) chu Raj Bhavan-ah hmuin an hmalakna leh hmachhawpte a sawipui.

Larsap General (Dr) Vijay Kumar Singh (Retd) chuan Meteorological Centre Aizawlin July ni 27, 2025 a kum hnihna hmel a hmu mai tur chu lawmawm a tih thu sawiin, Director & Head Pu Sudheer Kumar Dwivedi leh a thawhpuite duhsakna a hlan a. Khaw awm dan tur hrilhlawkna leh data pawimawh tak tak siam kawnga an hmalaknate fakawm a tih thu sawiin, hmalaknate tun aia zau zawka tihlara put darh zung zung a nih theih nan line department leh media-te zau zawka thawhpui tur leh mizo mipuite’n tangkai taka an chhawr theih nan Mizo tawng ngeia tarlan tum turin a chah a. Mizorama radar bun thuai a nih theih nana hma la rang turin a chah nghal bawk.

He hunah hian Pu Sudheer Kumar Dwivedi chuan Meteorological Centre Aizawl tihchangtlung kawnga Larsap hmalakna leh thlawpna an dawn thin avangin lawmthu a sawi a. PowerPoint Presentation hmangin an hmalakna leh hmachhawpte a sawifiah a ni.

Meteorological Centre Aizawl hmalakna hrang hrang tarlan zingah hian VVIP lo zin apianga an kalna tur hmuna khaw awm dan tur hrilhlawkna siam bakah ni 7 chhung atan zela Mizorama khaw awm dan tur hrilhlawkna siamte, tourist hip nana Aizawl Air Quality Index siam bakah Mizorama khualzinte kal tamna hmun 4 thlan chhuaha khaw awm dan tur hrilhlawkna (Tourist Places Forecast) siamte leh darkar 6 kalta khaw awm dan kimchang, social media leh website kaltlanga tarlante a tel a ni.

Hmachhawp an neih tarlan zingah hian kumin chhung ngeia Mission Mausam hnuaia Doppler Weather Radar, Laipuitlang, Aizawla bunte, Mizorama cyclone tleh thin zinga za zela 90 te chu chhim lam atanga lo thawk a nih avangin Meteorological Office, Siahaa bunte leh zirlaite tan Aizawl Meteorological Centre-a Training & Awareness Centre dinte a tel a. Heng bakah hian nakin zel atana lo inruahman lawk nan Aerodrome Meteorological Station (ASM), Lengpui chu tun aia changtlung zawk Aerodrome Meteorological Office (AMO) a hlankai an tum a ni.