Central sawrkar Fisheries Department-in cheng Nuaih sangkhat a sanction chu hman lohvin a la awm thu Rajya Shaba MP Pu K.Vanlalvena hrilh a ni.

#ZONEWS July 26, 2025: Central sawrkar Fisheries Deptt in kumin April thla khan Mizoram Fishery Dept. hnenah SNA SPARSH Scheme kal tlangin cheng Nuaih sangkhat a sanction a, hei hi hman lohva a awm thu Rajya Sabha MP Pu K Vanlalvena hnenah thlen a ni.

MNF Party thuchhuah tarlan danin, Mizoram sawrkarin tun thlenga he pawisa hi a la hman loh avangin sanction dang lokal leh tur cheng nuaih zasarih pawh an dawn loh phah theih thu DONER CONSULTATIVE COMMITTEE ningani-a New Delhi-a Parliament Annexie Committee Rooma thutkhawm ah Fisheries Deptt Director chuan a sawi a ni.

MNF chuan April 2025-a sanction tawh cheng nuai sangkhat chungchang hi hriat an duh thu leh a rang thei ang bera puangzar tur in a phut a. Central sawrkarin a hmanna tura a pek ang ngeia hmang a, sum la hmuh tur tibothlau zawnga khawsa lo turin a chah bawk a ni.

He meeting ah hian Rajya Sabha MP Pu K.Vanlalvena chuan Union Minister of DONER Pu Jyotiraditya Scindia hnenah zawhna siamin kum 2023-2024 atana Union Ministry of DONER in Mizoram PWD hnena Keitum to N.Mualcheng, N.Mualcheng to Zawlsei motor kawngpui sial thatna tura pawisa a lo sanction tawh chu, tun thlenga hna tan a la nih loh thu sawiin, he pawisa pek tawh hi hnuhkir leh a ni ta nge Mizoram sawrkarin hmun dangah an divert tih a zawt a. Meeting leh hunah he zawhna hi chhan tura dah a ni.