MINISTER IN UG LEH PG EXAM A TOP 10 A LANGTE LAWMPUINA HUN BUATSAIH

#ZONEWS Aizawl July 28, 2025: Pu Lalnghinglova Hmar, Minister of State, Sports & Youth Services Dept. etc., leh Aizawl West II Assembly Constituency bialtu MLA ni bawk chuan vawiin chawhnu khan tunhnaia Undergraduate Exam 2025 leh Postgraduate Exam 2025 ah te a bial chhung atanga top 10 a langte lawmpuina hun MINECO, Aizawl a a office chamber-ah a hmang a, pawisa fai Rs. 10,000/- theuh leh lawmpuina thuziak a hlan.

Minister Pu Lalnghinglova chuan, “Mizoram-ah top 10 a lang thei chin chu in titha in ka lawmpui tak zet che u a, midang tana entawntlak in ni. Kan chhehvel boruak a zir hian thil thenkhat hi chu a lo chhuak mai thin a, chuvangin kan thenawm velah lehkhathiam an tei sup sup chuan kan naute zel pawhin lehkhathiam ve an chak dawn. Chu chu vawiina kan thiam ang tawka lawmpuina hun kan buatsaih chhan pawh hi a ni a. Lawmpuina tam tham tak pawh kan inpe thei lova, amaherawhchu a hminga hetia lawmpuina kan inpek hian naupangin an lo hmu ve anga, lehkhathiam te chak ve se, nangmahni tan mai ni lovin kan vengah, kan velah lehkhathiam hi chawimawi lo ni se tih kha kan rilru a awm a ni.” a ti a. “Tuna in thlen chin hi hlawhtlinna kailawn ania, a harsa lai in thleng dawn chiah. Competition tak tak a intan dawn a, class a inti tha hi ka lawmpui hle che u a, mahse a zawhna a ni lo. In kalkawng a intan dawn chiah a ni.” a ti bawk.

Tun tumah hian Aizawl West II chhung atangin UG leh PG Exam-ah subject hrang hranga top 10 a lang thei mi pariat lawmpui an ni.

1. Malsawmdawngkimi D/o H. Vanlalfaka Tuikual North RIPANS M.Sc Nursing 1st Rank

2. Lalduhawmi D/o Sailozuala Tuikual North Mizoram University MA in Mass Communication & Journalism Gold Medalist

3. Lalrinthanga S/o PK Liana Dawrpui Vengthar – MA in Economics Gold Medalist

4. Vanlalawmpuii D/o Thangliankhuma Tuikual North St. Mary’s College, Shillong (NEHU) B.Sc (Clinical Nutrition & Dietetics) 4th Rank

5. Lalchhanhimi Khiangte D/o K. Lalhmingmawii Dinthar IASE Bachelor of Education (B.Ed) 6th Rank

6. Sharon Lalruatpuii D/o C. Lalthlamuana Dawrpui Vengthar IASE Bachelor of Education (B.Ed) 8th Rank

7. Zomuansanga S/o R. Lalrinkima Dawrpui Vengthar Mizoram University MA in Public Administration 9th Rank

8. Vanlalawmpuii D/o KC Laihnuna Dawrpui Vengthar Mizoram University MA in Economics 10th Rank

An thiamna te thil tak taka chantir ngei tura chahin, “Hmasawnna hi kawng hrang hrangin a awm teh meuh a, mahse a bulthutah chuan hmasawn tur chuan lehkha kan thiam a ngai. Chumi kawngah chuan nangni hi in veng theuhah a meichher chhitu ni ula ka duh. Chuvangin tuna in thlen chin hi a tawp thlenpui ngei ula, in thiamna hi hna hmuhpui ngei tur che u in ka chah duh che u a ni.” a ti.

Zirlai ti thate lawmpuina hunah hian an chhungte bakah khawtlang hruaitute an tel ve bawk.