Minister Pu B. Lalchhanzova’n Khawzawl DC Office Revenue Branch a hawng

#ZONEWS Khawzawl August 13, 2025: Vawiin khan Land Revenue & Settlement Minister Pu B. Lalchhanzova chuan Deputy Commissioner’s Office hnuaia Revenue Branch a hawng.

Minister Pu B. Lalchhanzova chuan he hun hi Tuichang bialtu MLA Pu W. Chhuanawma leh Khawzawl Bawrhsap te pai chhuah a ni tih sawiin an ngaihven avang leh an vei vang a ni tih a sawi a, an chungah lawmthu a sawi. Ram siamthatna hna a ni a, revenue department pawh kawng hrang hranga thuamthuatna leh siamthatnaah an tang hle a ni tih a sawi a, Khawzawl district-ah chauh lo pawh hma an la zel a ni tih a sawi. Khawzawlah hian Food Civil Supplies & Consumer Affairs lamah pawh a department a nihna angin kawng hrang hranga tihchangtlun zel a tum tih a sawi. Revenue department tangkai zia hi kalkhawmte’n an lo hriat thar ngei a beisei thu a sawi a, online hmanga revenue dawr theihna tur te pawh hmalakna a awm mek a ni tih a sawi bawk. He revenue branch thara officer leh staff thawk tur te fuihin mi zahawm tak leh biak nuam taka dawngsang hram turin a chah a, harsatna leh buaina karah taima tak leh tuarchell taka thawk zel turin a fuih a ni. He office branch thar hawn theih nana thawk zawng zawng, department-a thawkte leh district-a thawkte chungah lawmthu a sawi a, an thawhrah a ni tih sawiin fak an phu hle a ni tih a sawi. Revenue branch thara thawk turte tha taka thawk turin duhsakna a hlan a, harsatna leh buaina a awm chuan pui turin an inring reng a ni tih a sawi bawk.

Land Revenue & Settlement Secretary Pu Vanlalmawia chuan thu sawiin DC Office hi District Collector nihna an neih angin he revenue branch hi hmasawnna rahbi a nih ngei a beisei thu a sawi a, Minister hova hmalakna an neih that zar a ni tih a sawi bawk. Ram inrelbawlnaa pawimawh tak a ni a, revenue lam a fel loh chuan thil dang pawh a khawih buai thei tih a sawi a, district inrelbawlnaah pawh a tangkai ngei ang tih a rin tlat thu a sawi.

Revenue Branch hawnna hun hi Khawzawl Bawrhsap Pu K. Vanlalthiana’n a kaihruai a, he huna Minister zahawm tak a lo tel thei hi lawmthu a hrilh a. Land Revenue & Settlement Director Pu R. Lalthazuala chuan technical report pein post siam dan te leh staff dah dan te, post siam belh tum te, land record hrang hrang pek thlak chungchang te leh revenue branch hna thawh dan tur te a sawi. Settlement Officer Pu Timothy R. Lalhmangaiha’n lawmthu a sawi a, hun tihtawp a ni.

He hunah hian Land Revenue & Settlement secterariat leh directorate staff te, Khawzawl district office hotute an tel a ni.