Mizo Students’ Union District Headquarters, Hnahthial chuan Hnahthial District chhunga Zirlai Titha Chawimawina hun an hmang.

#ZONEWS July 18, 2025: Vawiin chawhnu dar 1:00 khan Govt. Hnahthial College Auditorium-ah Mizo Students’ Union District Headquarters, Hnahthial chuan Hnahthial District chhunga Zirlai Titha Chawimawina hun an hmang a. He hun hi Pu Zothanmawia Khiangte Addl. DC chuan khuallian niin a hmanpui a ni.

Khuallian, Pu Zothanmawia Khiangte, Addl DC chuan thu sawiin vawiinah zirlai titha chawimawi tur sawmhnih paruk (26) lai kan nei thei hi a lawmawm hle a ni a ti a. Chutih rual chuan zirlaite chu tlang pakhat an lawn chhuak chauh a ni tih hre tura a duh thu sawiin tum bul fuk tak nena zir tak tak hun a ni tawh a ni a ti bawk.

Pu Zothanmawia Khiangte chuan internet nen kan inchenchilh tawh a, a bik takin social media kan hman nasat avangin kan hman thiam a tul tak zet a ni a ti a. Eizawnna hmuhna atan te a kan hman tangkai a tul rualin kan hnam nunphung pangngai kal pel lo turin a chah a. Lehkha kan thiam sang a nih pawhin Mizo kan nihna a bet tlat – thlan laih te, mitthi lumen te, aia upa zahna te leh thil dang tam tak te hi changkan san lova, chhunzawm zel a, chawisang zawk turin a chah bawk a ni.

He hunah hian Pu H. Lalrinliana, Treasury Officer Hnahthial chu khualzahawm niin Pu Zodinsanga, GS MSU General Headquarters chu Uaptu a ni a. Tv. Lalzarelliana, GS, MSU, Hnahthial chuan report pe in Tv. K. Malsawmkima, President MSU chuan lawmthu sawiin hun a khar a ni.