Mizoram Deputy Speaker Pu Lalfamkima’n Government Kolasib College Graduation Day 2025 a hmanpui.

#ZONEWS Kolasib July 25, 2025 Zirtawpni: Vawiin khan Government Kolasib College chuan Graduation Day 2025 chu Main Hall, Govt Kolasib College ah an hmang a. He hun hi Pu Lalfamkima, Deputy Speaker, Mizoram Legislative Assembly chuan khuallian niin a hmanpui a, kumin a Graduate thar te leh College zirtirtute leh zirlai thahnem tak an tel a ni.

Graduation Day 2025 hmanna ahhian Khuallian, Pu Lalfamkima, Deputy Speaker leh Kolasib Bialtu MLA nibawk chuan thu sawiin, kumina Graduate tharte chu lawmpuina leh an hma hun kalzel tur atana duhsakna a hlan a. An graduate atanga hun reilo te ah dinhmun inanglo tak tak a an la din tur thu sawiin, a then chu hna an hmu nghal anga, a then erawh kawng thui zawk an la zawh dawn a ni tiin, chung hun a lo thlen pawh a beidawng mai lo tura chah in,tluk chang awm thin mahse tlu hlen lova an zinkawng chu inzirna atana hmang zel turin a chah a; competitive line la bei tur te pawh an tuang tichhah turin a fuih nghal bawk.

Pu Lalfamkima chuan graduate kalkhawmte chu mi puitling, kawng thui zawk kal na atan pawh a kawtchhuah thleng tawh anni, a ti a. An hlawhtlinna chu anmahni pawh an inchhuang tur a ni tiin, inrintawkna nena hmalam pan zel turin a chah a. Hringnun chu inzir zelna a ni tiin, hna zawn kawngah pawh hna tha ber bik a awm theilo a, mi thenkhat hna sang tak an thawk tawh emaw kan tih pawh an hna bansan in thildanga kal leh te an awm a, chuvang chuan an hma hun atan anmahni chu a pawimawh ber an ni tiin mahni duhzawng leh kan tih duh te kan hriatchian angai a, chumi thleng tur erawh chuan kawng thui tak kan zawh angaih chang a awm thin a ni, a ti.

Zirlai kalchhuak turte hnenah fuihna thu sawi chhunzawmin, college an zawh chuan thil tamtak anmahni ah a innghah tawh dawn avangin an zalenna an hman thiam a pawimawh hle a ni, a ti a. Hlawhtling tur chuan taihmakna, tih tak takna leh beidawn loh a pawimawh takzet a ni tiin, mahni inringtawk taka hmalam a ke pen zel turin a duhsak takzet a ni, a ti.

Vawiina Govt kolasib Colege Graduation Day hmanna ahhian Pu Laltanpuia Rengsi , Principal, Govt Kolasib College chuan zirlaite hnena thuchah sawiin hun bul a tan a. Zirlai kalkhawmte, a bik takin Graduate te chu a lawmpui thu sawiin,an hma hun kal zel tur atan duhsakna a hlan a. An college in University exam a result tha tak an nei chu a lawmawm takzet a ni tiin, tuna zirlai la ni mek te pawh tan la zual sauh turin a fuih bawk.

Govt Kolasib College atang hian MZU undergraduate examination, may 2025 a neih ah zirlai 143 in an exam a , heng zinga 94 hi an pass a ni. Hlawhtlinna chang zingah hian Distinction 2 awmin, First Division 66 leh Second Division 26 an awm a, za zela chhutin exam zawng zawng atanga 65.70% in hlawhtlinna an chang a ni. An College atang hian Mizoram puma Top 10 a lang pakhat , Geography Department atangin an nei bawk.

Vawiin a Graduation Day lawmna ahhian thusawi, zai leh hnam lam entirna hun te hman a ni a. Heng bakah hian Zirlai ti tha chawimawina- excellence award te hlanna hun te leh Mementos leh Certificates te hlanna hun hman a ni bawk. Pu Christopher JZ Lawlor in lawmthu sawina a neih hnu in vawiin hun hi tihtawp a ni.