Mizoram Larsap-in Serchhip District a tlawh

#ZONEWS Aizawl August 11, 2025: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan lehlangin Serchhip District a tlawh. He hunah hian Sawrkar department hotute, tlawmngai pawl aiawhte, Kohhran hruaitute leh Ex-Servicemen-te a kawm a. 14 Assam Rifles Hqrs., Shalom Special School leh Sainik School, Chhingchhip te a tlawh bawk. Larsap hi Serchhip Helipad-ah DC Pu Paul L. Khuma leh SP Pu Gavit Gogna leh Brig Pushpendar Sorayan, DIG HQ Assam Riftes te’n lo hmuakin Guard of Honour pek a ni.

Serchhip DC Pisapui Hall-a Sawrkar Department hotute hmaa thu a sawinaah, Larsap General (Dr) Vijay Kumar Singh chuan District mawi leh nuam tak Serchhip District-ah hmalakna fakawm tak tak hmuh tur a awm chu lawmawm a tih thu sawiin, official-te chungah beiseina a san avangin tun aia hmasawn zel tura theihtawp chhuah zel turin a fuih a. India rama ziak leh chhiar thiam tamna ber an nihna chu zirlaite chher hriam nan leh chhawr tlaka siam nana hman tum turin a fuih a. National Education Policy 2020 tha taka kalpui a tul thu leh, Sawrkar laipuiin zirna tihhmasawn nan sum leh pai tam tak a sen thu sawiin, Mizorama school tha tak tak -Eklavya Model Residencial School, Kendriya Vidyalaya, Sainik School school leh Jawahar Navodaya Vidyalay – te banphaka Sawrkar laipuiin a chhawp chhuahte chu chhawr tangkai turin mipuite a chah a. Tunhmain Central service-ah Mizo an awm nual thin thu sawiin, zirlaite chu hemi lam ngaihtuah tur leh Sawrkar laipui administration-a Mizo tam zawk an luh theih nana theihtawp chhuah turin a chah a ni.

Larsap chuan Sawrkar laipuiin mipuite dawmkan nan scheme tha tak tak a siam thu sawiin, official-te chu a bik takin tribal tana duan special scheme-te zirchianga a mamawhtu dik tak te’n an chhawr tangkai theih nana tan la zel turin a chah a. Loneitute thlai thar sawngbawlna leh organic thlai thar lama tanlak chu nakin zel atana pawimawh a nih thu sawiin, department hotute chu farmer-te tan tha thlah lova hma la turin a chah a. Ruihhlo hluar zelin pawikhawihna a tih punlun thu leh a do let kawngah khawtlang anga tanrual a tul thu sawiin, kan thalai, nakin lawka kan ram inghahna turte hi ruihhlo lak ata chhanchhuak turin theihtawp kan chhuah tlan a tul a ni, a ti bawk.

Serchhip District chanchin, inrelbawlna leh Sawrkar hmalakna tlangpui sawifiahtu DC Pu Paul L. Khuma chuan chuan thuneitue hnena mipuite’n complaint awlsam taka an thehluh zung zungna tur Vantlang Viltu Application siam a nih thu leh, hnathawh tawh dan, fund dawn dan leh neih zat awlsam taka en mai theih turin MLA fund digitise a nih bakah Jal Jeevan Mission 100% zawhfel a nih thu a sawi a. NH-54 thawmthat leh tihzau hna pawh 100% zawh thawkhat a nih thute, Bana Kaih (Handholding) Policy kaltlangin sawhthing 8845.28 quintal lei a nih thu leh farmer-te account ah Rs 4,20,64,748/- thun a nih tawh thute, PGCIL sum cheng vaibelchhe 21 leh NESIDS sum cheng vaibelchhe 50 hmanga District Hospital sak mek a nih thute, Solid Waste Management lamah theihtawp chhuaha hmalak chhoh a nih thu leh Serchhip Town Beautification Project tha taka kalpui a nih thute a sawi bawk.

Serchhip SP Pu Gavit Gogna chuan Dan leh thupek kenkawh kawnga hmalaknate sawifiahin, kumin bikah July thla tawp thlenga chhinchhiah danin pawikhawihna thleng zingah mi in rawk (41%) a tam ber thu leh, rukruk (22%) leh case dang 37% a awm thu a sawi a. SP tarlan danin heroin tum 4 man niin, hengte hi avaiin 127.29 gram, a hlut zawng Rs 3,80,680/- hu a ni a. Local zu 1,286 litre man niin, Rs 6,43,000/- hu a ni a. Heng bakah hian Urea bag 300, Rs 7,20,000/- hu an man tawh a. Myanmar raltlan 647 leh Bangladesh 266 nei mekin, Myanmar raltlan 132 te Biometric Enrollment zawhfel tawh a ni.

He hun hi Addl. DC Pu Lalrinzuala chuan kaihruaiin Pu Isaac Lalchhuanmawia, Sr. EE, PHED chuan lawmthu sawiin hun hman a khar a ni.

Hemi hnu hian Larsap chuan Tlawmngai pawl, Kohhran hruaitute leh Ex-Servicemen-te a kawm a. 14 Assam Rifles Hqrs. P&E Veng tlawhin Commandant Col Archit Goswami, SM chuan an hmalaknate a hrilhfiah hnuah sipaite a kawm zui a. Shalom Special School, New Serchhip tlawhin thawktute a kawm bakah naupangte tan thilpek eitur a sem a. Assam Rifles hotute chu building mamawh leh thawmthat ngaite lo enzui turin a chah a. Larsap hian kum 2010 khan Shalom Special School building sakna tur lungphum a lo phum sak tawh a ni.

Hemi hnu hian chawhnu lamah Sainik School Chhingchhip tlawhin, Principal Col S. Dhar, AEC leh a thawhpuite’n an lo dawngsawng a. Larsap chuan Mizoramin Sainik School tha tak a nei chu lawmawm a tih thu a sawi a. Sainik School chuan zirna mai piah lamah nunphunga pawimawh thil dang tam tak a zirtir thu sawiin, hei hian zirlaite chu an thanlen zelna kawngah a puih dawn thu a sawi a ni.