DISTRICT ADMINISTRATION SIAHA LEH MARA AUTONOMOUS DISTRICT COUNCIL, SIAHA HNUAIA DEPARTMENT HRANG HRANGIN FAINA CHUNGCHANGAH JOINT INSPECTION AN NEI.

#ZONEWS Siaha December 3, 2025 : Vawiin khan District Administration Siaha leh Mara Autonomous District Council, Siaha hnuaia department hrang hrangte chuan a huhovin Siaha khawpui faina leh thianghlimna chungchangah joint inspection an nei.

Senior LAO, MADC Pi S. Lalmuanpuii office-ah tanna hun hman a ni a, member inhmelhriattirna neih a ni bawk. Thu sawiin Pi S. Lalmuanpuii chuan District administration, Siaha leh MADC in lungrual taka hma an laho thin chu lawmawm a tiin hun lo kal lehzel turah pawh thawhhona tha tak an neih a beisei thu a sawi a, member kalkhawmte chu an hun hlu tak senga an kal khawm avangin lawmthu a hrilh bawk.

Pi S. Lalmuanpuii chuan ‘faina inelna neih tur puala chhuakho tur ni mah ila faina hi kumtluana kan hma lakna tur a ni a, fai tur hian hun leh ni bik a awm hran lo a ni’ a ti. Sawrkarah chuan department hrang hrang kan awm a, kan hnathawh inang lo theuh mah se kan thawh chhan ber chu mipuite tan a ni a, chu chu kan rawngbawlna pawh a ni. Tum dangah pawh DC Siaha nen thawhhona tha tak hnuaiah fehchhuah neih thin a ni a, department mala hma lak aiin mipuiin an ngai pawimawh a, rah tha a chhuah niin a lang a; a tam thei ang ber chhuahho tum ni se a duh thu Sr. LAO hian a sawi bawk.

Vawiina Siaha khawpui chhung fankualnaah hian Pu Henry PL. Hnaihly, Local Administration Officer, MADC-in a ho a, Dr. Lalnunfela Chhangte, SDC Siaha, Pu Laldinpuia Sailo, SDC Siaha leh Road Transport Department, MADC, Local Administration Department, MADC leh Mizoram Journalist Association, Mizoram Police aiawhte an tel a,  veng hrang hranga In hmun lai mek, Tuihawk luankawr hnawha leivung paih, kawngpui hnaih lutuka insakna bungrua dah leh lirthei hlui tawh lutuk kawngpui sira inhung reng te, lirthei dahna (parking) hmun ni lova lirthei dahte vai niin chawitir ngai chu challan pein pawisa chawitir nghal zel an ni.