Mizoram Presbyterian Kohhran thalai, KTP te chuan ruihhlo do beihpui an thlak mek

#ZONEWS July 19, 2025: Mizoram Presbyterian Kohhran thalai, KTP te chuan ruihhlo do beihpui an thlak mek a, tun thla tir atang khan zana khawlaia ruihhlo ngai awm te ngaihvenin Street Ministry an kalpui tan a, an hmalakna hian December thla thleng a awh ang.

Central KTP hnuaia Ruihhlo Do Committee Secretary Pu David Lalruatfela chuan Street Ministry chu KTP Rorel Inkhawm Vawi 11-na in a rel angin CKTP Ruihhlo Do Street Ministry chu tun thla ni khat atang khan kalpui tan a nih thu Akashvani a hrilh a. Zirtawpni zan apiangin Aizawl khawpui chhungah chuan hmun 14-ah KTP Branch hrang hrang te insemdarhin Ruihhlo ngai te ngaihvena, ei tur te pein a tul angin counselling te pek thin a nih thu a sawi a. Mizoram chhunga khaw hrang hrangah pawh KTP Branch ten an remchan anga an neih thu a sawi a ni.

Pu David Lalruatfela chuan Ruihhlo Do beihpui chu KTP ten kawng hrang hrangin an thlak mek thu a sawi a. Street Ministry mai bakah KTP Branch tin te anmahni huam chhunga ruihhlo avanga harsatna tawk te ngaihven tura ngen an nih thu leh hma pawh an la meka an hriat thu a sawi a. Ruihhlo that loh zia thuziak tarlanna hoarding pawh branch tin te tar turin an ngen tih sawiin Aizawl khawpui chhung branch bik chu AMC-ah a hlawmin tar phalna dil mek a nih thu leh, khawpui pawn lamah chuan nasa taka hoarding tara hma an lak tawh thu a sawi a. Ruihhlo thatlohzia inzirtirna branch tinah nei turin an in ngen thu a sawi a. Video clip tawi insiamsiak pawh buatsaih mek a nih thu a sawi a ni.