Mizoram Rubber Society (MIRSO) chuan August ni 16-a Assam Police leh Forest Department mi leh saten Saikhawthlir leh Diltlang Lui zaua rubber phun tawh leh phun mek thahnem tak an tichhia chu an dem thu an tarlang.

#ZONEWS August 18, 2025: Mizoram Rubber Society (MIRSO) chuan August ni 16-a Assam Police leh Forest Department mi leh saten Saikhawthlir leh Diltlang Lui zaua rubber phun tawh leh phun mek thahnem tak an tichhia chu an dem thu an tarlang.

Thuchhuah an siamah chuan Chief Minister’s Rubber Mission Pilot Project kalpui meka Saikhawthlir leh Diltlang Lui zaua an kuthnathawhpui Pu Zoliana leh Pu Lawpa-ten CM Rubber Mission atanga rubber chi an dawn, tha leh zung tam tak senga an phun tawh leh phun mek thahnem tham tak bakah an hmanruate, ramri kân meuha an rawn tihchhiat sak chu an dem thu an tarlang a, chumai duhtawk lo va an unaute an rikrap chu pawi an ti a, a tawp thleng an tan MIRSO chu an din tlat dawn thu an tarlang bawk.

Puan tawh angin inrinni chawhnu dar 2 vel khan, Diltlang lui zau a Rubber tiak phun sa leh phun turte chu Assam lam police leh Assam forest lamin an tichhia a, Saikhawthlir VCP Pu Lalthuthlungmawia hnen atanga thudawn danin Assam police mi 8 leh Assam forest mi 2 te lokalin Diltlang lui zau a Mizoram Land Resources, Soil & Water Conservation Department-in a kalpui mek CM Rubber Mission hnuaia rubber chingtute Rubber phunsa leh la phunloh rubber tiak 300 vel chu an rawn sam chhia a ni.

Hemi hnuaah hian nimin khan Mizoram leh Assam lam aiawh hotute leh Saikhawthlir khawtlang hruaitute thil thlenna hmunah kalin an inbiaa, hotu sang zawk ten inbiakna an neih leh hma chuan khawi lam zawk zawk pawhin kut kutthlak tawh hrih loh nise an ti a ni.