Mizoram Tourism Department leh IRCTC in thawhhona thuthlung an ziak

#ZONEWS Aizawl August 07, 2025 : Tourism Department, Govt. of Mizoram leh Indian Railway Catering & Tourism Corporation (IRCTC), Ministry of Railways hnuaia PSU te chuan nimin ni 7 August, 2025 khan Mizoram a Tourism hmasawnna atan thawhhona thuthlung an ziak.

Thawhhona thuthlung hi Lalthakimi Pachuau, Joint Director, Tourism Department leh RN Ranmung, Chief Regional Manager, IRCTC, Guwahati ten kum hnih atan an nemnghet a ni. He thawhhona thuthlung hian nasa leh zuala Mizoram in tourism lama hmasawn theihna tura hmalakte, khualzin te awlsam  zawka an inkal pawh theihnan te, awmze nei zawk a khualzin te hmunhma an tlawh tur an tlawh theihnan te leh an hmun tlawh turte an duhdan mila duansak bakah khualzin tam zawkin kan ram an tlawh theihnan a hmalak te leh thildang tam tak a tel a ni.

Mizoram Tourism mai bakah a ram mipuite tan mellung pawimawh tak tur niin, khawvel hmun zau zawka Mizoram phochhuahna leh khualzin tam zawk kan neih theihnan a min thlunzawm tura hna thawktu tur pawimawh tak an ni dawn a ni.

September, 2025 a rail lu Aizawl a lo lut mai tur atana thawhho na tangkai tak a ni dawn a. IRCTC hian Mizoram mipuite khawvel hmun zau zawk nen a min thlunzawm turin October thla chhung hian Special Tourist Train rawn luh tir an tum thu an sawi a ni. Kan ram hmunhma mawi leh tlawh tur kan neihte tour package a siamin zauzawk a khualzin kan hip theihna tur kawngah nasa takin hma an la dawn a. Heng bakah manman zawka tlawh theihna tur outbound tour package te an chhawpchhuak dawn bawk a ni.