MJA Lunglei District-in Home Minister Pu K. Sapdanga chawimawina leh lawmpuina hun an hmang

#ZONEWS Lunglei August 16, 2025: Vawiin khan Mizoram Journalists’ Association (MJA) Lunglei District chuan Lunglei Press Club Conference Hall-ah MJA General Headquarters President hlui leh Prominent Journalist, Mizoram sawrkara Home Minister Pu K. Sapdanga chawimawina leh lawmpuina hun an buatsaih.

He hunah hian Home Minister Pu K. Sapdanga hi Lunglei West bialtu MLA Pu T. Lalhlimpuia, Lunglei Municipal Council (LMC) Chairman Pu Lalzuithanga leh Vice Chairman Pu K. Lalrinawma te’n an ṭawiawm a. MJA Lunglei District President Pu H. Lalthansanga hovin member 17 te’n lo dawngsawngin, Press Club an fanpui bakah, amah chawimawina leh lawmpuina thuziak leh hriat rengna thlalak an hlan.

Minister Pu K. Sapdanga chuan khawvelah journalist-te pawimawhna a hniam thei lo tih sawiin, thu thar lak khawm leh theh darh hna chu ram leh mipuite tana rawngbawlna pawimawh tak a nih thu a sawi a. Mizorama journalist-te MJA-a pum khata an inhlawm khawmna chu an dinhmun tihlutu pakhat a nih thu sawiin, MJA chu ngai pawimawha ngai hlu zel turin member-te a chah a. Sawrkarin journalist-te hamṭhatna atan damloh nikhuaa inenkawlna te, journalist thi ralna leh pension te a siamsak chu a hlu hle tih sawiin, sawrkar hotute duhsakna leh MJA member-te inpekna leh ṭan rualna zara hlawhtling a nih thu a sawi a. Journalist-te’n mit, beng leh ngaihtuahna hmanga theih tawp an chhuah rah mipuiin an lo chhawr chu a hlu hle tiin, lungawi tak leh ṭhahnem ngai taka an hna thawk zel turin journalist-te chu a chah a. An chawimawina chu phu lo a intih thu leh ropui leh lawmawm a tih tak zet thu a sawi.

District MJA Treasurer Pu K. Lalrinpuia’n hun kaihruaiin, Secretary Pu Thanghmingliana Renthlei chuan report a pe a. President Pu H. Lalthansanga’n Minister Pu K. Sapdanga an chawimawi chhan sawi fiahin, kum 2006-2010-a General Headquarters President a nih laiin kum 2006-ah Mizoram puma district hrang hrang journalist-te MJA-a inpum khata an luh kim thu te, a President laiin Lunglei Press Club chu hawn a nih thu leh amah chu MJA Hnahthial Sub-Division hawngtu a nih thu te a tar lang a. MJA General Headquarters President a nih laia Lunglei District MJA te a enkawlna leh tun thlenga a ngaihsaknaa lawm thu sawi nan chawimawina leh MLA-a thlan tlin a nih leh Cabinet Minister a nih avangin lawmpuina hlan an nih thu a sawi.

Hw hunah hian Minister chuan Zunzam chanchinbu website – zunzamnews.blogspot.com chu a tlangzarh nghal a. District MJA Vice President Pu Lianchama Chhangte chuan lawm thu a sawi bawk.

He hunah hian Lunglei West bialtu MLA Pu T. Lalhlimpuia chuan journalist-te chu mipui rilru sukthlek siam ṭha tura hmanraw pawimawh tak an nih thu sawiin, an theihna chu ṭangkai taka hmang zel turin a chah a. Ram hmasawnna atana hma laknaah hmasawnna daih rei leh tlo ngaihtuah a ṭul thu leh ram dang nena insumdawn tawnna remchang awm tur pawh dawngsawng thiam tura inpuahchah a ṭul thu te sawiin, chumi kawnga mipui zirtir leh kaihruai tur chuan journalist-te a chah a. Ṭawngṭaiin hun a khar.

MJA Lunglei District-in Home Minister Pu K. Sapdanga an chawimawina thuziakah hian:

“MJA President (2006 – 2010) i nih laiin, Mizoram District hrang hranga Journalists’ Association-te Mizoram Journalists’ Association-a inchhûng lût kim a, huang khata kan awm hi i hmalâkna leh thawhrimna a ni a, chhuanawm kan ti takzet.

“Kum 2023 Mizoram inthlanpuia MLA-a thlan tlin i ni leh Cabinet Minister (Home Minister etc.) i ni hi, kan lâwmpui êm êm che a, ram leh hnam tâna rawngbawltu ṭangkai tak ni zêl tûrin duhsakna kan hlân a che.”

tiin an ziak a. “Pu K. Sapdanga, President, MJA Gen. Hqrs-in, Lunglei Journalists’ Association leh Member 29 te December Ni 1, 2006-ah Mizoram Journalists’ Association-ah a lawm lut” tih thuziak nen, a lawm lut lai thlalak an hlan tel bawk.