MOVCD-NER PHASE IV HNUAIA ORGANIC FARMER PRODUCER COMPANY-TE TANA VALUE ADDITION & FOOD PROCESSING TRAINING KHARNA HUN HMAN A NI

#ZONEWS July 18, 2025: Vawiin chawhma khan Mission Organic Value Chain Development For North East Region (MOVCD – NER) Phase IV hnuaia Clover Organic bultuma ni 2 awh, ‘Value Addition & Food Processing Training’ kharna hun chu, Clover Organic Pvt. Ltd. Office, Chanmari, Ramhlun road-ah Agriculture & Farmers Welfare Minister Pu PC Vanlalruata hovin hman a ni a. Pi PC Lalngaihsaki, Asst. Project Officer, Clover Organic Pvt. Ltd. chuan hun kaihruaiin Pi H.Zodinpuii, State Coordinator, Mission Organic Mizoram chuan a telpui a ni.

Agriculture Minister Pu PC Vanlalruata chuan a taka kuthnathawktute kaihruaitu, District hrang hranga Farmers Producers Company-a Chief Executive Officer-te thiamna leh theihna tihpunna tura Clover Organic Pvt. Ltd. in ‘Value Addition & Food Processing Training’ an buatsaih chu lawmawm a tih thu a sawi a. Kuthnathawktute tihhmasawnna tur leh hlawk zawka an thil thar chhuahte tihral a nih theih nan District hrang hranga Farmers Producers Company CEO-te chu an thil zir leh thiam tharte, kuthnathawktute hnena hlan chhawng zel turin a chah bawk a ni.

Agriculture Minister chuan tihtak taka beia kuthnathawk thin te hmalakna chu innghahnatlak leh dinchhuahpui thama siam a nih theih nan ‘Post Harvest Management’ lamah tan lak nasat a tul thu a sawi a. Thlai leh thei tharchhuahte chu thiamna tha tak taka hmanga sawngbawl a, man man zawk a tihral dan ngaihtuah a pawimawh thu leh, kuthnathawktute leh an thil tharchhuah lei duh turte inthlunzawmna tha (Market Linkage) buatsaih a pawimawh thu a sawi.

Pi H.Zodinpuii, State Coordinator, Mission Organic Mizoram chuan Mizorama thar chhuah, Sapthei tui siam chu State dangin an ngaih hlut thu a sawi a. District hrang hrang Farmers Producers Company CEO-te pawhin an district enkawl theuha thlai leh thei tharchhuahte chu Mizoram pela hralh chhuah tur a tha leh hralh chhuah tham thar chhuah a nih theih nan hma la turin a fuih.

Clover Organic Pvt. Ltd. buatsaih, ‘Value Addition & Food Processing Training’ ah hian Pi Vanlalramchhani Chhangte, Post Harvesting Technology, SAMETI chuan thlai thlan bik; Sapthei, Lakhuihthei, Serthlum, Aieng, Mizo hmarchate leh Sawhthing atangtea thei tui, pickle, Candy leh Powder siam dan zir a ni a. Tuikum Organic Farmer Producer Company Limited (Serchhip), Tuipuiral Organic Farmer Producer Company Limited (Champhai), Raifan Organic Farmer Producer Company (Khawzawl), Tlawng Thlang Organic Farmer Producer Company Limited (Mamit) leh Tuivawl Organic Farmer Producer Company Limited (Aizawl) atangtein Farmer Producer Company CEO-te he training-ah hian an tel a ni.