MSPCC IN HANDHOLDING SCHEME DINHMUN THLIRHO; MRB IN SCHEME HNUAIAH LOAN PECHHUAK TAM BER

#ZONEWS Aizawl October 13, 2025  : Mizoram State Policy Coordination Committee (MSPCC) chu vawiin khan Planning & Programme Implementation Department Committee Room-ah Vice Chairman Dr. KC Lalmalsawmzauva hovin an thukhawm. Meeting hian Handholding Phase 1 hmalakna thlirletna leh hmalakna tur dang hrang hrang en ho a ni.

Vawiin meeting-ah hian Handholding Scheme hnuaia Loan Component atanga loan pekchhuah dan thlir hovin, loan dilna lut zawng zawng 11,439 atangin loan 702 approve tawh a ni a, diltu 201 in an dawng tawh a ni. Scheme hnuaia bank thawhpui (Partner Banks) ten bank an pekchhuah danah Mizoram Rural Bank in an pechhuak tam ber a, loan 152 pechhuak tawh in, pending erawh 176 an nei a. State Bank of India in 40 pechhuak tawhin la chinfel loh 84 an nei a; Mizoram Cooperative Apex Bank in loan 17 pechhuak tawh bawkin chinfel hmabak 25 an nei a ni. Heti hian Loan atana sum pekchhuah zawngz awng zat belhkhawm chu Rs. 14,41,60,600 a ni. Phase-I hnuaia DPR approve ngai tlem la awm te chu vawiin committee ah hian thlirho a ni bawk.

Cm Special Package hnuaiah Phase-I chhungin dilna lut zawng zawng 29,571 atangin 2258 thlanchhuah a ni a, a vain sum pekchhuah zat chu Rs. 18,33,58,370 a ni.

Handholding Scheme Phase-II dilna hawn tan leh mek niin, vawiin thleng hian loan dilna 132 a lut tawh a, Cm Special Package hnuaiah dilna 22,365 a lut tawh bawk.