NH 306 & 06 THAWMTHAT HNA KAL MEK CHUNGCHANGAH KOLASIB DC CONFERENCE HALL-AH THUTKHAWMNA NEIH A NI

#ZONEWS KOLASIB October 17, 2025 : Vawiin khan Kolasib DC Conference Hall-ah National Highway 306 & 06 thawmthat hna kal mek chungchangah thutkhawmna pawimawh tak neih a ni a. He hun hi Pi B Malsawmtluangi, Addl DC Kolasib chuan a kaihruai a, SDO (Sadar) Kolasib, PWD Mizoram atangin Sr.EE (PWD Kolasib leh Highway Division III, Kolasib ) te, SDPO, DTO, Youth for Kolasib aiawhte, 4Lane PMU contractor-te, MTA District Headquarters Kolasib leh JAC Kolasib Chairman te leh NHIDCL aiawhte an tel a ni.

Thutkhawmna kaihruaitu Pi B Malsawmtluangi, Addl DC chuan thusawiin, National Highway 306&06 chu Mizoram tana chak lakna ber (lifeline) anih avangin kawng chhiat leh that ah Mizoram mipuite an nitin ei bar kawngah thui takin a nghawng nasat zia a sawi a. Hun rei tak he kawng chungchang hi ngaihtuahin hotu lianah te pawh thlen a lo ni tawh thin a ni, a ti . Vawiina kalkhawmte pawh an ngaihtuahna te seng a, theihtawp chhuah a sawiho turin a chah a. Heng meeting-a thutlukna te hi thuneitu sangah thlen anih leh thin avangin a hlawkzia an hriat a pawimawh thu a sawi bawk. Pi Malsawmtluangi chuan NHIDCL leh contractor-te chu hei aia ngawrh lehzuala hma la turin a hrilh bawk a ni.

Meeting-ah hian Highway kawng siam hna chu Jandu Construction Company te kuta awm a ni tih tarlan a ni a. Amaherawhchu, Jandu te hian ruahtui a la tlak avangin hna an la tan thei rih lo niin an sawi a. Hemi kar lakah hian, BR Goel te chuan kawng khuar lai hnawh (pothole fillings) hna an lo thawk mek a. He an hnathawh hi ziaka agreement hranpa awm lo, Jandu leh BR Goel te inkara inremna (internal arrangement) anga an tih a ni. BR Goel te hian an hnathawh mek, a khuar zual lai hnawh chu Ni 25 October hma ngeia thawh zawh an tum thu an sawi bawk. Kawng chhe zual lai, a leilung nghet tawklo te, kawng hnuai atanga tui put te leh side drain mumal loh avanga kawng thawmthat pawh a tha rei thei thin lo a awm avanga bika PQC a tih tura dilna pawh an thlen thu sawiin , NHIDCL aiawhte chuan PQC siamna tur hi approval an la hmuh loh avangin a chhe zual lai siam runpui hi tan ala nih loh thu an sawi a. Zawhna chhangin, Jandu Construction Company aiawhte chuan kum khat chhung agreement an neih angin, nakum March thla hma ngeiin kawngpui metal /bitumen phah hna hi thawh zawh theih an inbeisei thu an sawi. Kolasib area chhung bik pawh a khuar lai hnawh leh bitumen phah chu thla thar a hna tan theih an in beisei thu an sawi bawk.

Hemi chungchang a zawhna leh chhanna te sawiho a nih hnuin, Pi B Malsawmtluangi chuan  an thurel te chu minute felfai taka ziak chhuakin thuneitu sang zawk te hnena an thlen tur thu a sawi zawhin vawiin thutkhawmna hi  tihtawp a ni.