Party bil sawi lo a, a thar tam apiang an intodelhna tura, thlai thar lei saktu chu ZPM Party chiah hi kan la ni

#ZONEWS #POLITICS Lunglei August 04, 2025 Thawhtanni:
Vawiin khan Pu F. Rodingliana, P&E Minister chuan, Chakma Autonomous District Council huam chhunga Kamalanagar – IV, MDC by-election lo awm turah, Campaign hun tawpna, Kamalanagar – IV Community hall ah, CADC ZPM Party buatsaih a hmanpui.

He hunah hian Pu F. Rodingliana chuan thu sawiin, Mizoram kawng chhiat chhan chu sawi ngai lovin kan hre vek a. Kum khat leh a chanve chhunga han siam tha duak duak tur chuan hun hi kan la nei tlem deuh a ni. Kan sawrkar atangin hma kan la nghal a, kum 2028 – ah chuan Mizoram kawngpui 100-a 80 hi chu siam tha vek turin hma lakna kalpui tum a ni’ ati.

Pu F. Rodingliana chuan, Tripura – Lengpui, Silchar – Aizawl, Aizawl – Lawngtlai leh kawngpui pawimawh dang te pawh siamthat vek tum a nih thu a sawi. Kan sawrkar hi Central hian a ngai pawimawh em em a, Power & Electricity dept. tih changtlun nan, kum khat leh a chanve chhung lekin cheng nuai 16000 min pe tawh a ni, a ti bawk.

P&E Minister chuan, Kan sawrkar kal mekah, Party bil sawi miah lovin kut hnathawktute thlai thar, Sawhthing leh hmarcha, hmunphiah te pawh, an thar chhuah ang ang kan lei a, a thar tam apiang an intodelhna turin, an thar chhuah ang ang kan lei sak zel dawn a ni, a ti bawk. Central sawrkar dawr kawngah kan CM Pu Lalduhoma chuan Prime Minister chu tun kan sawrkar hun rei lo te chhung hian tum li zet a hmu tawh a, Home Minister pawh tum 5 lai a hmu tawh tih sawiin, Central Ministry hian kan sawrkar hi a ring hle a, kan mamawh kan thlen te pawh min tihsak tam ta hle tih sawiin, Assam rifle hmun Aizawl khawpui laili a mi pawh kan sawnchhuak thei te hi a lawmawm hle a ni, a ti bawk.

Pu F. Rodingliana chuan, tun MDC by-election neih turah hian, ZPM candidate chu inlo thlan tlin ngei kan beiseiin, vote theuh turin he bial mipuite a ngen a ni. Minister chuan hnathawktu chu hlawh hmu tlak a ni a, State sawrkar nen insi rem taka hnathawhpui theih tur inthlan thiam a tul hle a, Kan Party candidate Dg. Dinesh Moy chakma hi lo vote vek turin ka sawm che u a ni, a ti.

He hunah hian Pu Lalmuanpuia Punte, Adviser to CM pawhin, thusawiin, – CADC area-ah ZPM hian sawrkarna kan lak ngei a tul a, sawrkar lai thawhpui thiam in nih hi a tha hle dawn a, Kan Candidate hi inlo vote tling anih chuan, CADC-a ZPM ticket-a thlan tlin hmasak ber a nih dawn avangin, Kamalanagar – IV bial hi kan ngaihsak viau dawn che u a ni, a ti.

He hunah hian, Pu Lorrain Lalpekliana Chinzah pawhin thu a sawi bawk a ni.

Pu F. Rodingliana, Minister of State hi Pu Lalmuanpuia Punte, Adviser to CM, Pu Lorrain Lalpekliana chinzah Adviser to CM, Pu Vanlalsiama GS (Legal) Gen. Hqrs, leh Southern hqrs atangin, Pu C. Lalhmingliana, President, Pu Lalrinpuia consultant leh secy. ten an tawiawm bawk a ni.