PATHIAN A TEL VE PHAWT CHUAN BEISEINA A NUNG RENG ṬHIN

#ZONEWS #FIANRIAL August 13, 2025:
Vawiin kan fianrial hunah chuan Ezekiela leh ruam ruhroa khat chungchang hi ngaihtuah teh ang. Pathian chuan Ezekiela chu ruhro a khat ruam a inlarnaah chuan a hmuhtira. Chung ruhrote chu rawn inzawm khawm lehin Pathian chuan thaw a pe a, rawn nung lehin, mi hring pangngai ang chiahin an lo awm leh a ni. Pathian hnen atanga thi tawh, nunna nei tawh lo ruhro chu Pathian thutiamah chuan an la nung leh vek dawn a ni tih chhinchhiahna Pathianin a entir a ni. Mihring fapa chuan an hnenah thu a sawi a, an lo nung leh ta tih kan hmu a ni.

RUHROA KHAT RUAM
Hêng ruhte hnênah LALPA PATHIAN chuan heti hian a ti a ni: Ngai rawh u, nangmahniah thaw ka luhtîr ang a, in nung ang (Ezekiela 37:5).

Beiseina awm tawh reng reng lo ni a ngaih theih dinhmunah I ding ve tawh em le?

Ezekiela bung 37-a kan hmuh ang hian, Pathian chuan zawlnei Ezekiela chu ruhroa khat ruamah a hruai a. Chung ruhrote chuan Pathian mite (Israel-te), Pathian laka thlarauva thi tawh, beiseina reng reng nei tawh lote a entir a ni tih Pathian ngei chuan Ezekiela a hrilh a ni. Pathian chuan Ezekiela hnenah, “Mihring fapa, hêng ruhte hi a nung thei ang êm?” tiin a zawt a ni. He zawhna hi kan rinna enfiahnan hmang ang aw, Pathian chu engkim siamthara siamtha leh thei turin kan ring tak tak em?

Ruhroa khat ruamah kal angin han inngaihtuah ta ila. Chutiang ruhro let rem rum atang chuan mihring an lo indin thar leh thei tur ang chuan kan suangtuah phak kher lo ang. Nimahsela, Pathian chuan an hnena thu sawi turin Ezekiela chu a hrilh a. Thu a sawi ve leh chuan chung ruhrote chu lo awmkhawmin, tisain a rawn tuam a, an rawn thaw leh a ni tih kan hmu a ni. Eng ang pawhin Pathian chu lo hlat san tawh mah ila, eng ang dinhmunah pawh lo ding tawh thin mah ila, Pathian thlarau chuan engkim a siam tharin a siam tha leh vek thei a ni. Pathian thiltih theihna hi min siamthaa min siam thar leh turin a chak tawk a ni.
Kan nun hi ruhro ang mai a, Pathian thlarau laka hrang leh a chenchilh loh niin kan inhre ve tawh thin em? Chutiang dinhmuna kan awm tawh chung chuan, Pathianin keimahniah nunna thaw chu thaw lutin nun thar chu min pek leh theih kan ring tak zet em?

Pathian chuan taksa siamthatna mai ni lovin, thlarau lam siamtharna pawh Ezekiela kha a tiam a ni. Ezekiela hnenah chuan a mite chu an ramah a hruai kir leh anga thinlung thar leh thlarau thar a pe dawn a ni tih a hrilh a ni. Chu thutiam chu Lal Isua Krista hmangin vawiinah kan chang ve thei ta a, Pathian nena inzawmna reng reng nei lo chu, A thute hmangin keimahniah nunna thaw chu thawkluhin a awm a, Pathian thlarau thianghlim hmanga siamthara awmin, Pathian nen engtiklai pawhin, kan duh tak zet chuan inzawm theihna hun remchang pekin kan awm leh ta. A van ropui em aw! LALPA chu fakin awm rawh se.
Vawiinah hian Pathian chu min siamthaa kan thinlung siamthar leh turin kan sawm ve thei ang em le? Kan thinlung leh kan nuna thil inthlakthleng a rawn thlen tur chu pawm turin kan inhawng ve thei tak meuh em?

Beiseina reng reng awm tawh lo nia kan hriatna hmunah pawh, Ezekiela hnena Pathian thutiam hi hre reng ang u. Kan Pathian hi nun nei tawh lote nun neih tira, beiseina reng reng nei tawh lote beiseina nung neih tir leh tur hian a chak tawk a ni. A thiltihtheihna chu ring tawk ila, kan zin kawngah hian eng dinhmun pawh hi a duh angin a thlak thleng thei vek a ni tih hi i ring tlat ang u.

NGUN TAKIN INNGAIHTUAH ILA!
Kan nuna, thlarau lama beisei bo leh ro vek ni a kan inhriatnate kha ngaihtuah teh ang. Pathian nunna thaw kan mamawh ve nia kan inhriatna hrang hrangte chu uluk takin ngaihtuah ila. Chung thilahte chuan thlarau lama siamthatna leh beiseina nung kan lo neih theihna turin, A thlarau thianghlim chu min awmpuia min siamthar turin Pathian hnenah dil ang aw.

Pathian chuan a tiam an ngeiin kan thlarau chu siamtha lehin, Amah nen kan inzawm reng theihna tura siamtharnaah chuan min hruai thei a ni tih hi i ring nghet tlat ang u.

ṬAWNGṬAINA
Hêng ruhte hnênah LALPA PATHIAN chuan heti hian a ti a ni: Ngai rawh u, nangmahniah thaw ka luhtîr ang a, in nung ang (Ezekiela 37:5).

Aw Lalpa, Ezekiela bung 37-a kan hmuh ang hian, Lal Isua chuan a thute hmangin nunna thaw chu keimahah a lo thaw lut tawh a, chu nunna thaw avang chuan nun thar ka lo nei thei ta, lawmthu ka hrilh a che. I nunna thaw chuan a lo chhem nun ve theihna turin, Chu thu chu midangte hnena puan ve zel ka duh e. Siamthatna chu a lo thlen a, thlarau siamtharna chu a lo awm theihna turin, ka nuna lo telve tute mai pawh hian chu I siamtharna chu keimah kal tlanga an lo chan ve theihnan, I nunna thu chu puana hrilh zel ka duh e. Isua hmingin ka dil e, Amen!