PATHIAN CHUAN A THILTIHTHEIHNA CHU HNIAL RUAL LOH A NIH ZIA LANTIR NAN, KHAWVEL MITE NGAIHA AWM ANG LO TAK TAK TE PAWH A KO ṬHIN.

#ZONEWS #FIANRIAL August 02, 2025:
Vawiin kan fianrial hunah chuan, Lal Isuan a zirte a thlan dan chungchang kha ngun takin ngaihtuah nawn leh teh ang. Tlanga Isua a tawngtai hnu khan, Ama bula awm a, A hnen atanga engkim zir a, A tawpa a hnathawh chhunzawm turin, mi naran leh mi pangngai 12 te kha Amah ngeiin thlangin a ko a ni. A zirtirte zingah khan Sangha mantu te, chhiah khawntu te, thlarau lama hruaitu ni tlak loa ngaih ni awm tak a hnua Amah phatsan leh hialtute thlengin a ko a nih kha.

SAWMPAHNIHTE
Tin, khawvar veleh a zirtirte chu a ko va; an zing ata sawm leh pahnih a thlang a, an hmingah pawh tirhkoh a vuah a (Luka 6:13).

Pathianin a tihtirtur che ni a i hriat, i thinlunga a dah titura tling lo ni a inhriat em em chang te i nei ve thin em?

Lal Isua kha a zirtir sawmpahnihte – mi hriat lar ni lem lo mi naran, thuneihna leh thiltihtheihna pawh nei lo, thlarau lamah pawh mi chak lo tak tur te a thlan chhuah hma zan khan, zankhuain a ṭawngṭai a ni. A then chu sangha mantute an ni a, pakhat chu chhiah khawntu a ni bawk a, kan hriat angin pakhat phei chuan a hnuah a phatsat leh hial a nih kha. Chuti chung chung chuan, khang mite kha Lal Isuan A chanchin ṭha puang darh tura a mi rinte an ni. He chanchinin thil pawimawh deuh min hriattir chu: Pathian hman ni tur hian khawvel teh dana mi tling nih kher a ngai lo tih hi a ni. “…. LALPA chuan mihring en dan angin a en ve si lova, mihring chuan pawn lam lan dan an en ṭhin a, Lalpa erawh chuan thinlung lam a en zawk ṭhin a ni” (I Samuela 16:7)

I nun i hman ṭhinah khan Pathian hman theih miah lova awm tir ṭhin che a awm em, engte nge ni le?

Isuan a zirtir sawmpahnihte a thlan khan, khawvel ngaiha duhthusam mite a thlang lem lo. An thinlung A siam theih tur, an rilru A siam thar leh ṭhin theih tur, A tana a tirh chhuah theih tur nun nei te kha a thlang zawk a ni. Ṭawng chungchangah te, thusawi chungchangah te, min engah maha an ngaih loh leh an hriat loh ni a inhriatnate, mi naran satliah ve mai ni a inhriatnate, kan nun dan avanga tling lo leh tlak lo tawp ni a inhriatna zawng zawng te nen, Pathian hmaah chuan tling lovah kan in ngai ṭhin a ni. Heng nihna zawng zawngte hi keimahni kal tlanga Pathian ropuizia puan chhuah a nih theihna tura nihnate a ni zawk. Pathian kutah chuan thil naran kha thil tihtheihna neiah a lo chang mai ṭhin zawk a ni.

Kohna chhang turin nangma inpeih hun nia i hriat kher kha i lo nghak ve ṭhin em?

An chanchin kan ngaihtuah mekte pawh hi Lal Isua tana thil eng emaw a taka titura koh an ni. Lal Isua zirtirte ang bawk hian A hnung zui phawt mai tura koh kan ni a, A hnung kan zui phawt atang chuan nun inthlak thlengna chu a lo thleng mai dawn a ni. Isua zuina chuan kan nuam tih em emna hmun atangin min la chhuak a ni thei e, nimahsela kan nuna Pathian duhdan lalna hmunah min dah zawk dawn a ni tih hre reng ang u. Tupawh mai hian Lal Isua hnung zui tura duh kan lo thlan mai a, tih tak zeta Lal Isua hniakhnung zui duhna kan lo neih hian Pathianin min lo hmang thei mai hi a lo ni, chiang takin zirtir sawmpahnihte chanchin hmang hian chu chu min hriattir nawn leh a ni.

Lal Isua hnung zui tura ‘Aw’ han tih mai kha vawiina i nun danah khan eng ang nge ni tura i ngaih le?

NGUN TAKIN INNGAIHTUAH ILA!
Khawvelin min beisei dan ni lovin, Pathianin min kohna zawn ni a kan hriat a ṭang zawkin kan nun hi ngun takin han en chiang ila. Ka la inpeih lo emaw, tling tawk lo ni a inhriat vang emaw in, Lal Isua hnung zui tak tak tura ‘Aw’ tih mai kan harsat ve ṭhin em le? I hma lama i nun dan tur leh Pathian tana i nun chhan kha, I hun kal tawh atang khan teh ṭhin suh. Vawiina kan nun hi Pathianin engtin nge hman a duh tih hi Pathian hnenah i zawt zawk ang u. Thlarau lam emaw, tisa lamah emaw a mamawhte hnen va thlen pawh a ni thei a, ringtute inpawlhona Kohhran ka tel venaah pawh a ni thei, midangte va fuih te pawh a ni thei, vawiin nia thu awih taka ka awmna hian chatuan a thleng thei a ni.

ṬAWNGṬAINA
Thil tha ti atan Krista Isuaah chuan siama awmin ama kut chhuak kan ni si a; chu thil tha tih chu kan awmna turin Pathianin a buatsaih lawk a ni. – Ephesi 2:10

Aw Lalpa, I kut chhuak a zawnga mawi leh tha ber, ṭha i tih em ema min siam avangin lawmthu ka hrilh a che. Chutiang taka uluk leh fimkhura, Nangman ni tura min duh ang tak ni thei tura min buatsaih avangin lawmthu ka hrilh a che. Thil chi hrang hrang tithei turin thil thlawn pek tam tak min pe a, finna te, thiamna te leh tawnhriat tam tak min pek zawng zawng avangte hian lawmthu ka hrilh a che. Ka tan thil tha tin reng chu i lo ruahmana, nangma tana chhan nei turin, I Lalram leh I ropuina atan ka lo piang ve a ni tih ka hriatin lawmthu ka hrilh a che. Nangman “hna ṭha” I tihte chu min hriattirin min kawhhmuh la, chung thilte chu pawimawh hmasa bera ka neih theih nan min pui ang che. Keima mimal suangtuahna, beiseina leh duh zawngte chuan chu “I hna ṭha” lak ata chu min kawih pen loh nan min pui la. Nangman min koh chhan leh min siam chhan chauh chu ka tih a, chu lam kawngah chauh ka kal theih nan min pui ang che. Isua hmingin ka dil e, Amen!