PATHIAN KUTAH CHUAN, HARSA TAKA KAN BEIHNA TE, KAN HREHAWM TAWRHNA TE HI KAN TANA THA TURA INTHLAKTHLENGNA HMANRUAAH A LO CHANG ṬHIN.

#ZONEWS #FIANRIAL August 05, 2025:

Vawiin kan fianrial hunah chuan, Pathianin Judate chunga rorelna leh thununna lo thleng tur chungchang puang tura zawlnei a thlan, Jeremia chanchin ngaihtuah ila. Lal Josia rorel hun laiin, Jeremia chu Juda mite hnenah Pathian rorelna lo thleng tur hriattir tura koh a ni a. Tihduhdahna leh sawichhiatna, hnawlna nasa tak tawk mahsela, Jeremia chu Pathian kohnaah chuan rinawm takin a ding tlat a ni.

5 Tichuan LALPA thu chu ka hnênah a lo thleng leh a:
6 Aw Israel chhûngte u, he belvawtu tih ang hian ka tithei lo che u êm ni? Tih hi LALPA thu chhuak a ni. Ngai teh u, belvawtu kuta hlum ang mai hian ka kutah in awm a ni, aw Israel chhûngte u. (Jeremia 18:5-6)

Pathianin harsatna leh chona hmanga a kohna che i hmachhawn ṭhin kha, I tan harsa lutuk ni a hriat chang I nei ṭhin em?

A hmelmate, a khingpuite karah pawh Jeremia rinna kha a nghing ngai lova. Judate sualna nasa tak mai hun laia zawlnei ni tura koh a ni a, Pathian rorelna puang tura hna hautak tak mai chu Jeremia kovah a innghat a ni. I hna leh tihtur chu, thinrimna leh tharum thawhna nen an lo hmachhawn dawn che a ni tih hre ta la engtin nge I tih ang?

Dodalna nasa tak a tawk chungin, Jeremia’n a tihtur a ṭhulh phah lo a. Pathianin A rorelna chungchang a hmuh lawk tir chu: Belvawtu’n thil mawi zawk siam tura hlum a sawngbawl thin ang chiahin Judate chungah a lo thleng dawn a ni tih thu a ni. Kan harsatna leh tawrhnate hi a tha zawnga thil inthlakthlengna tur hmanrua niin kan hre ve thin em, chutiang zawng chuan kan thlir ve tlat thin em le?

Jeremia huaisenna chu Pathian thil tum a rinna thuk takah chuan a innghat tlat a. Thuawihna tak tak chuan tawrhna a keng tel tih a che chiang a, chutihrual erawh chuan chu tawrhna chuan thlarau lama thanna pawh a thlen bawk a ni. Kan nunah Pathianin hna a thawk a ni tih kan hriat si chuan, chu kan hriatna hmang chuan fiahna chu tuar thei turin chakna kan hmu ve thei ang em le?

Pathian thununnate hi hremna ringawt ni lovin siamthatna leh tlanna pawh a ni tel a ni tih Jeremia inlarna leh thiltawnte hian min hrilh a ni. Belvawtu chuan uluk taka hlum a sawngbawl ang chiahin, Pathian chuan kan hrehawm tawrhna leh harsatna kan tawnte hmangin min tithianghlim ṭhina, Ama tan min buatsaih ṭhin a ni. I nun hman thinah khan Pathian kuta a duh anga siamrem tura I inpumpek ngaihna hmunte a awm ve ṭhin em le?

NGUN TAKIN INNGAIHTUAH ILA!
Kan dinhmun mek hi min siamthat nan leh min tihthianghlim nan Pathianin a hmang thei a ni tih ngaihtuah ila. I nungchang emaw, I rinna emaw Pathianin a duh anga a siam rem ngai I nei ve em le? Pathian thil tum chu kan ṭhatna tur leh A ropuina tur a ni tih i ring tlat ang u.

Fiahna kan hmachhawn thinte rinna nen tuar chhuak thei tura chakna kan neih theih nan, keimahniah A thiltum chu a lo lan theih nan Pathian hnenah dilin i tawngtai ṭhin ang u.

ṬAWNGṬAINA
Hluma bel a siam lai chu a lo that loh chuan belvawtu chuan tha a tih angin bel dangah a din leh mai ṭhin a (Jeremia 18:4).

Ka Pa vana mi, Vawiina I thu ka chhiarte hi a nihna dik tak chu ka hriat fiah theih na tur leh I thutak chu ka vawn tlat theihna turin ka thinlung thuk takah min dah ngheh sak ang che. Nangman tihtur min pek chu pawm a thawk thei tur leh I kohna chhang turin vawiin hian ka rawn inhlan thar e. Ka rilrua rinhlelhna a luh changin, Nang chuan chu rinhlelhna chu I thu hmangin I rawn kan fai tir ṭhin dawn a ni tih ka hria a lawmthu ka hrilh a che. Jeremia 1:5-a I thuin a sawi angin, Nang chuan tuisik ka nih hma pawhin min hre tawh a, ka nu pum chhunga ka awm lai pawhin I tan min serh hrang tawh si a. Anchhia reng reng ka dawn lohna turin nang chuan I thu hmangin ka chungah malsawmna chu I lo sawi vek tawh si a. Miten min ringhlel a ni emaw, min ring a ni emaw, Nangman min kohna leh ka tana I lo ruat chu an la bo thei hek lo. Chuvangin Jeremia ang hian sawi tura min duhte chu sawi turin nghet taka din tlat ka duh e. Ka nuna Belvawtu chuan min siamremin, I ropui nan min din thar leh mek a ni tih ka hriatin lawmthu ka hrilh a che. Engkim mai hi Nang nen chuan a theih vek a, tih hlawhtlinin a awm dawn a ni tih ka hriatin lawmthu ka hrilh a che. Isua hmingin ka dil e, Amen!