“PATHIAN RINNA CHUAN HLAUHNA CHU AMAHA INNGHAHNAAH LEH TAWNGTAINA CHU THILTIHTHEIHNAAH A CHANTIR ṬHIN”

#ZONEWS FIANRIAL July 29, 2025:

Vawiin kan fianrial hun chu Lal Hezekia rinna leh Assuria lal Senakeriba lak atanga Judate Pathianin a chhanchhuah dan chanchin kan ngaihtuah dawn a ni. Lal Hezekia, rinna chak tak, Pathian puihna dila a ṭawngṭai dan leh, Pathianin a dilna chhanga Assuria sipaihote zak taka a hnawhbo dan, rinna thiltih theihzia leh chumi avanga chunglam rawn inrawlh dan chu kan ngaihtuah dawn a ni.

Nunnem zaidam, tihlumtu rapthlak tak ni bawk si chu.

2 Kings 19:15-16
15 Tin, Hezekia chu LALPA hmaah a tawngtai a, “Aw LALPA, cherubte chunga ṭhu, Israela Pathian, nang, nang chauh hi leilung ram zawng zawng Pathian chu i ni; lei leh vân hi nangma siam a ni.
16 Aw LALPA, i beng lo chhi la, ngaithla teh; aw LALPA, i mit meng la, en teh; Pathian nung sawichhe tûra Senakeriban thu a rawn sawi hi ngaithla teh.

Harsatna leh chona hautak tak maiin a hmuak che a, engtia hmachhawn leh hnehtur nge hre mai lovin ngaihtuahna buai takin i hmang ve tawh em?

Lal Hezekia chu chutiang dinhmun harsaah chuan a ding a ni. Assuria lal Senakeriba leh a sipai rual ropui tak maiten Judahote an hual lai khan, dinhmun khirhkhan leh harsa tak maiah chuan Lal Hezekia chu a ding a. Dinhmun hlauhawm taka a din lai pawhin, Hezekia rinna chu a nghing aih lova. Mihring chakna leh theihna ringawt chuan a chhanhim thei lo a ni tih a hre chiang hle a; A tawpkhawpa an beiseina innghahna chu Pathian A rawn chet ve hun chu a ni.

A hmelmate nena dinhmun inthlau lutuk leh an hual velna karah khan Hezekia kha a rinnaah engtin nge a dinngheh tlat theih chhan ni ang le?

Hlauva khur chhe mai lovin, Hezekia chu a che chhuaka, an hmelmate chet tibuai turin an tui hmuhna kawng a tihtawp sak a, Chu aia pawimawh zawk chu, a harsatna tawh chu Pathian hnena dilna thlenna hunah a hmang ta zawk a, Pathian kaihhruaina leh chhanhimna a dil a ni. Senakeriba sipaite chuan Judahote rilru tih chiai tumin nasa taka tielin an vau bawk a, nimahsela Hezekia chu nghet takin a ding tlat a, a mite chu Pathiana rinna nghat tlat turin a fuih tlat bawk.

Eng kawngin nge kan lungngaihna leh manganna chu tawngtainaah kan chantir anga, indona kan hmachhawn mek chu Pathian chinfel turin a kutah kan dah ve theih ang le?

Chhanhim an nih theihna tura Hezekia nasa taka a ṭawngtaina chuan Pathiana rinna a nghahzia a tarlang chiang hle mai. Pathian chuan Hezekia tawngtaina chu chhangin, A Vantirhkoh chu Assuria sipai rualho tihlum turin a rawn tir ta a, Assuria sipaiho chu mualpho takin an tawlhkirin an haw leh ta a ni. He hnehna mak tak mai hian ṭawngtaina thiltitheihzia a lan chian tir a. Hmelma rapthlak ber ber lakah pawh A mite chhanhim tura Pathian thiltihtheihna nasa tak chu a lantir bawk a ni.

Harsatna leh chona kan hmachhawn chu eng anga hautak pawh ni sela, Pathian hnena tawngtainaah chantir fo zawk turin Hezekia chanchin hian min hrilh nawn a ni. Hezekia rinna leh hruaitu a nihnaa a thiltih hian, mahni chaknaa innghat lova, chunglam thiltihtheihnaa innghah zawk a pawimawhzia min entir a ni.

NGUN TAKIN INNGAIHTUAH ILA!
Tuna harsatna emaw, chona kan hmachhawn mek kha ngaihtuah teh ang. Keima theihna hmanga hmachhawna hneh ka tum nge, Pathian hnen lam hawia Amaha innghat turin a kaihhruaina leh a tihchakna ka dil dawn le?

Nitinin i tihtur leh i buaina neihte chu, Pathianin a lo ngaithlain a chhang ngei dawn che a ni tih ring tlat chungin Pathian hnenah thlen thin ang che. I tawngtaina nun chu thuk zawkin i nitin nun laimuah, harsatna leh thil i hmachhawn ṭhin zawng zawng innghahnaah hmang ṭhin ang che.

ṬAWNGṬAINA
2 Chronicles 32:20-21
20 Chutichuan lal Hezekia leh Amoza fapa zâwlnei Isaia chuan chumi avâng chuan an ṭawngṭai a, vâna mi an au va.
21 Tin, LALPAN vântirhkoh a tir a, chu chuan Asuria lal riahmuna mi chak huaisen zawng zawng te, hma hruaitu hotute chu a tihlum a. Tichuan zak tak hmêl puin a ram lamah a haw leh ta a. Tin, a pathian ina a va kal chu ama rila rahte ngeiin khandaihin an lo tihlum ta a.

Chak tak leh huai takin awm rawh! Aw LALPA, Nangmah avangin heng thute hi vawiina ka hnena thusawi tura ka duh leh ka thlante chu an ni. Joshua leh Hezekia ten indona an hmachhawna I thutiam an tana i dah ang ngeia hnehna chantirtu PATHIAN, danglam ngai lo chu i nih avangin I hming chu ka fakin ka chawimawi e. Chu humhimtu kut leh thiltihtheihna ngai tho chu ka nunah i lantir ṭhin avangin ka fakin ka chawimawi che a ni. Dodalna leh nasa taka beihna karah pawh i thiltihtheihna mak tak chuan hnehna min pe sela. An chakna leh chuangchuanna hmangin rawn bei thin nimahsela, Aw LALPA, Nangmah chauh hi min dopui turin ka ring che a, hnehna chu I hnena thinlung taka ka rawn tlukluhnaah a innghat a ni tih ka hria e. I rorelna ang zela beih leh hmalam pan ka duh a. I kutah chauh chuan hnehna chu a awm tih ka hriat avangin, Nangmah avangin chak tak leh huai takin ka awm zel dawn a ni. Isua hmingin ka dil e, Amen!