PHED Minister Prof. Lalnilawma’n Lunglei khawpui tui lakna Pialthleng leh Tlawng lui tlawhin, GLWSS tihchangtlun hna thawh mek a enfiah

#ZONEWS Lunglei December 9, 2025: Mizoram sawrkara Public Health Engineering Department (PHED) Minister Prof. Lalnilawma chuan vawiin khan Lunglei khawpui tui lakna, Greater Lunglei Water Supply Scheme (GLWSS) hmun Pialthleng leh Tlawng lui tlawhin, Lunglei khawpuiin tui hnianghnar zawk a hmuh theih nana AMRUT 2.0 leh SASCI hnuaia GLWSS tihchangtlun hna thawh mek a enfiah.

PHED Minister hi Lunglei Municipal Council (LMC)-a Vice Chairman Pu K. Lalrinawma leh Executive Councillor Pi Lalhruaitluangi Sailo te, sawrkar official-te, political party hruaitute, Lunglei District Consumer Association (LDCA) hruaitute leh MJA Lunglei District member-te’n an ṭawiawm a. PHED Lunglei Circle-a Superintending Engineer Er Lalsanga hovin PHED official-te leh hna thawktu contractor te’n lo dawngsawngin, GLWSS tihchangtlunna tur ruahmanna leh hna thawh mekte an lo kawhhmuh bakah, an harsatna leh hmachhawpte Minister hnenah hian an lo thlen a ni.

He hunah hian GLWSS tihchangtlun hna thawh mek chungchang leh hma lak zui dan turte sawi ho a ni a. LDCA hruaitute leh MJA hruaitute chuan kum 2026 ṭhal lo thleng turah Lunglei khawpuiin tui harsatna a tawh tawh loh nan Tlawng lui tui khuah (gravity dam siam) hna thawh mek chu chak taka thawh a, a hun taka zawh a nih an beisei thu sawiin, chak zawka hna thawh a nih theih nana khawl leh thawktu dah belh ngai leh hmanraw mamawh lak khawm kawngah pawh contractor-te chu chak zawka hma la tura an phut thu an sawi a. SE Er Lalsanga chuan hna kal dan leh fur avanga hna khaihlak dan te, chak taka hna thawh a nih theih nana department hma lak dan leh hmachhawp an neih te a sawi fiah bawk a. LMC Vice Chairman Pu K. Lalrinawma pawhin Lunglei tui harsatna tiziaawm tura hma laknaah PHED leh LMC councillor-te’n thawh hona ṭha tak an neih thu sawiin, a theih ang anga thawhpui zel an inhuam thu a sawi ve bawk.

PHED Minister Prof. Lalnilawma chuan GLWSS tihchangtlun hna thawh mek chu Lungleiin tui thianghlim hnianghnara a hmuh theihna tura hma lakna pawimawh leh lawmawm tak a nih thu sawiin, hna ṭha tak leh chak taka kalpui a nih theih nan department lam pawhin theih tawp an chhuah thu leh contractor-te pawh a ṭul anga an nawr reng thu a sawi a. Tuna hma lakna kal mek bakah, Lunglei tui lak tihchangtlun zelna turin scheme hrang hrang hnuaiah ruahmanna leh hmachhawp an neih thu tar langin, Tlawng tui khuah hna leh tui lak tihchangtlun hna thawh mekah LDCA leh MJA te’n an veipuinaah lawm thu a sawi a. Kil tin aṭanga ṭan hona leh thawh hona aṭangin hna ṭha taka thawh theih a nih a beisei thu sawiin, Tlawng tui khuah bik chu March 2026-a zo hman ngei tura hma lak tum a nih thu a sawi.

Tuna Lunglei tui pump mekna – Greater Lunglei Water Supply Scheme hi November ni 22, 1995-ah hman ṭan niin, tunah hian kum 30-a upa a ni tawh a. Lunglei tui lakna, GLWSS tihchangtlunna tur hian ṭhuang hnihin hma lak mek a ni a. Kum 2054 (kum 30 hnu) thlenga mihring 1,11,827 chawm thei tur, Tlawng leh Pialthleng lui aṭanga tui lakna tur ruahmanna, upgradation of GLWSS (pumping & distribution system) chu SASCI (Scheme for Special Assistance to States for Capital Investment) 2024-2025 sum cheng vaibelchhe 55.7 (₹ 55,70,00,000/-) senga hma lak mek niin, civil work hi PHED-in departmental work-a thawkin, hmanrua leh khawl mamawh erawh chu supplier hnen aṭanga lak a ni a. He project-ah hian tui lakna main pipeline tihchangtlunna tur te, tui tihthianghlimna leh sawngbawlna (water treatment plant) tihchangtlunna leh siam belhna tur te, pump house leh a khawl thar dah belhna tur te, tui sem darhna (distribution system) leh electrical sub-station tihchangtlunna tur te a tel a. Kum 3 chhunga zawh tura ruahman niin, GLWSS-a awm tawh sa – Treatment Plant leh Sedimentation Tank te siam ṭhat mek a ni a. A hnuaia mite hi a thar hlak tur a ni bawk:

(1) Sedimentation chhawk zangkhai turin Pre-Settling Tank – Sak mek

(2) Pump House thar – Sak mek

(3) Backwash Tank – Zawh tawh

(4) Pialthleng–Ramzotlang Pumping Main 11km, 355.6mm diametrr ERW Pipe – Thawh mek

(5) Transformer Lian 5MVA, 33/6.6KV – 1no

(6) Electric Motor & Pump Set 990KW

(7) Control Panel

Tun dinhmunah hian cheng vaibelchhe 16 hmuh tawh niin, a pumpui thu-ah hna hi 44% vel zo tawha ngaih a ni a. He project hi zawh a nih hun chuan tuna tui lak mek, 3.5 MLD (Million Litres per Day) aṭang hian 5.5 MLD-a pungin, ni tin tui litre maktaduai 9 (9 MLD) pe chhuak thei tura beisei a ni.

GLWSS tihchangtlun nan hian AMRUT (Atal Mission for Rejuvenation and Urban Transformation) 2.0 hnuaiah sum cheng vaibelchhe 9.9778 sengin “Improvement of Water Sources and Extension of Distribution System for Greater Lunglei Water Supply Scheme” hna thawh mek ni bawkin, a hna pumpui hi 88% vel zo tawha ngaih a ni a. He scheme-ah hian khaw chhung, Pukpui lam tui semna duhthusam lo laite siam belh a nih bakah, hmun 8 – Polytechnic Complex-ah leh HATIM Complex-ah Demountable Tank (tuizem) a vaiin litre nuai 13 dawng siam a ni a. Hemi bakah a hnapui leh lian ber chu Pialthleng Pump House thlanga fur tui tam laia tui litre maktaduai 240 khuah tlin theihna tur Tlawng lui tui khuah – Gravity Concrete Impounding Dam siam a ni a. A hna hi HS Construction, Chanmari, Aizawl te’n thawkin, February ni 27, 2024 khan agreement ziah a ni a. Hna ṭan tura hmanrua lak khawm ṭan a nih laiin furin a nan avangin hna hi a hunah zo hman lovin, hna thawh hun hi pawh sei a ni a. Tui khuahna dam hi a bulṭhut (foundation) nen metre 15-a sang tura ruahman niin, tunah hian 35% vel zo tawha ngaih a ni.