REGISTRAR CO-OPERATIVE SOCIETIES-IN DULTE MPACS BUILDING HAWNG

#ZONEWS Khawzawl October 23, 2025: Dulte Multipurpose Primary Agriculture Credit Societies Building cheng nuai 8 senga sak chu vawiin chawhma dar 10 khan Pu John LT Sanga, Registrar Cooperative Societies chuan a hawng.

Pu John LT Sanga chuan Dulte MPACS Building hawnfel a ni chu lawmawm a tih thu sawiin, hei hian khawtlang thawhhona tha tak hnuaiah a kaihhnawih hrang hrang te’n lungrual takin hma an la tlang tih a entir a, khawtlang tana an thahnemngaihna hi a chhuanawm a tih thu a sawi. Co-operative hi Mizo ten tih tak zet a kan luhchilh a hun hle a, Society chuan hlawkna ai mahin mipuite hnenah thiltha leh nitin mamawh pek chhuah hi a tum a ni a, retheihna umbo a, dawm kan ngai dawn kanna hmanraw pawimawh tak a nih thu a sawi. United Nations chuan Cooperative Society pawimawhna hriain kumin 2025 hi International Year of Cooperatives a tan a puang a, Co-operative kal tlang hian Khawvel hi chhenfakawma siam a tum mek a, Dulte MPACS member te pawhin Society thil tum hriaa pawl hmasawnna bakah khawtlanga chhawmdawl ngai te chhawm dawltu ni turin a fuih. Sorkarin Society kaltlanga khawtlang nitin mamawh tih theihna tur tam tam a ruahman a, chung chu haichhuak thei turin MPACS member te chu ngaihtuahna seng a khawtlang tana chhenfakawm ni a, khawtlang mipui te pawhin Society te tawiawma hmasawnna nei turin a sawm bawk a ni. Pu John LT Sanga chuan Dulte MPACS-ah hian a hmasa ber atan Account a hawng nghal a ni.

Dulte MPACS hawnna puala hun hman hi Pu B Lalchhanhima, District Co-operative Officer, Khawzawl chuan kaihruaiin Pu Sanghruaia, Secretary Dulte MPACS in MPACS Building sak dan, Society dinhmun, hmalakna leh hmathlir te a sawifiah a, Pu H. Vanhlupuia Deputy Registrar leh Pu Lalmuanpuia Co-operative Audit Officer te’n thu an sawi bawk a ni.

Dulte MPACS Building hi Dulte MPACS sum hmanga sak a ni a, March, 2025 atanga sak tan niin October ni 23, 2025 ah zawhfel a ni. Zopa chhiara chhawng khat niin, square feet 300 a lian a ni a, a chung  hi MPACS Office tur a ni a, a hnuai hi nitin eichawp leh damdawi dawr atana ruahman a ni bawk.