RIMAWI KHAWVEL A HMINGDAILOVA – OZZY OSBOURNE A FAM TA! – Kenny Muanawma

#ZONEWS #ARTICLE July 23, 2025:
Dt. 5th July, 2025 khan an band – Black Sabbath in all star farewell concert atan ‘Back to the beginning’ concert an buatsaih a. Khami ṭum pawh khan:
“Kum 6 chhung zet damlohna vangin ka inkhung a, engtiang chiahin nge ka awm hi in hrethiam pha lo ang..” tia a dinhmun ṭhat lohzia sawiin, amah leh a rimawi lo ngainatu te hmaah, “Thinlung chhungril ber aṭangin lawmthu ka hrilh mawlh mawlh a che u..” a ti lawm lawm kha a ni a. An band farewell concert aṭanga ni 17 hnu lawkah, khawvela rimawi a awm chhung zawnga hming dai tawh lo tur Ozzy Osbourne pawh chatuan atan kan farewell a ṭul ve ta! Rimawi khawvel arsi lian a herliam ta si a.
A thih thu hi a chhungte chuan:
“Thu a hril chhuah zawh rual loh khawpa lungchhiatthlak zawkin, kan hmangaih lai Ozzy Osbourne chuan tukin khan mual min liam san ta tih kan puan a ngai a. A chhungte leh hmangaihna hual vel karah khawvel a mangṭha ta. Mimal tin te he hun khirh takah hian kan chhungkaw privacy min zahsak turin kan ngen..” tiin a thih thu an puanzarnaah hian a thihpui ber natna chungchang an ziak lang lem lo.
Khawvel a heavy metal music lar chhuahpuitu a chhal ngam a nih vang te, Black Sabbath band hi khawvelpum dengchhuak an nih vang te leh, a upat hnulama ‘The Osbournes’ Reality Show lama an chhungkaw nun hlim leh hmuhnawm em em mai min chhawp sak avang tein Ozzy Osbourne hian inhmelhriattirna mamawh lo khawpin kan hre sa ṭhumin a rinawm tho bawk a. Amah thlahna atan reng pawh a hringnun timeline tlem a zawng hi i han thai lang zawr zawr teh ang.
1948: Born John Michael Osbourne tih hming pu turin Birmingham, England ah December ni 3 ah a piang a.
1968: Tony Iommi, Geezer Butler leh Bill Ward te nen band ‘The Earth’ an din a, hei hi a kum leh, kum 1969 kjam Black Sabbath an ti chho ta a ni.
1970s: Black Sabbath in khawvel rimawi ri thar heavy metal genre lo pianchhuahna kawnga pawimawh em em album – Black Sabbath, Paranoid, leh Master of Reality te an tichhuak.
1979: Ruihhlo ngawl a vei zui vangin Black Sabbath aṭangin an ban!
1980: Solo career a kal ṭanin Blizzard of Ozz album, a hla hit em em ‘Crazy Train’ telna chu a tichhuak.
1981: Diary of a madman solo album a tichhuak
1982: A manager leh nun her danglam chhotu tur ni bawk Sharon Arden nen an innei.
1982: A guitarist Randy Rhoads chuan thlawhna chesualah a boral san a, Ozzy hian a tuar ngang mai a, “Keimahah hian thi ṭhen ve a awm a ni” tihialin a sawi.
1983: A solo album 3-na ‘Bark at the moon’ a tichhuak.
1986: A solo album 4-na ‘The Ultimate sin’ a tichhuak.
1988: A solo album 5-na ‘No rest for the wicked man’ a tichhuak.
1991: Mi tam takin a album a an duh ber ‘No more tears’ a tichhuak.
1995: Ozzmosis album a tichhuak
1997: Compilation album ‘The Ozzman Cometh’ a tichhuak.
2001: Down to Earth album a tichhuak.
2002-2005: Reality television show “The Osbournes” ah an chhungkuaa inlanin a hlawhtling hle.
2003: Bike accident ah na takin a inhliam.
2006: Rock and Roll Hall of Fame ah Black Sabbath member anga lakluh a ni.
2007: Black Rain album a tichhuak.
2010: Scream album a tichhuak.
2013: A hmangaih hmasa Black Sabbath ah kir lehin to record ’13’ tih album an release.
2016-2017: Black Sabbath band farewell tour ‘The End’ hmun hrang hrangah an nei.
2019: A hmaa hliam tizual turin a tlasual leh pek a, zai a tawh phah nual. Hemi kum hian Grammy Lifetime Achievement Award a dawng bawk.
2020: Ordinary man album a tichhuak.
2020: Parkinson’s disease a neih thu a puang.
2022: A solo album hnuhnung ber, ‘Patient Number 9’ tichhuak.
2023: Patient Number 9 album vangin Grammy Award pahnih – Best Rock Album leh Best Rock Performance a la kawp!
July 5, 2025: A damchhunga a concert hnuhnung ber tur ‘Back to the Beginning’ chu a band hlui Black Sabbath thlahna atan Birmingham, England ah an nei.
July 22, 2025: Kum 76 mi niin a boral!
Rest well OZZY OSBOURNE!